Nongpoh, Jylliew 03: Hadien bun ki jingud bad ka jingujor naki paidbah kiba leit sumar ha Nongpoh Civil Hospital namar ka jingduna ki doctor bad khamtam ka jingbym don doctor ha Special Newborn Care Unit (SNCU) and Nutrition Rehabilitation Centre (NRC), ka Ri-Bhoi People’s Council, sengkmie hapoh ka jingïalam u Bah Jayson Lennox Nongrum President bad u Bah Vincent Sohkhwai General Secretary mynta ka sngi kila leit ban jurip ïaka Nongpoh Civil Hopsital bad ban pan jingshai naka DMHO haba ïadei bad katei ka jingeh bad kumba ka seng kala ioh jingtip ruh ba nalor katei ka jingbym don doctor hakitei ki unit jong ka Civil Hospital, haduh mynta ym don Additional DMHO, District Malaria Officer, doctor ha Mawlasnai PHC bad kiwei kiwei.
Haba kren sha ki lad pathai khubor naka liang u Bah Jayson Lennox Nongrum u la ong ba kum ka seng kala leit ban ïakynduh ïa ka District Medical Health Officer ka Dr. AR Marak ban pan jingshai ha kaba ïadei bad katei ka jingeh ki paidbah bad ban sngewthuh khambha kadei ka daw ba ym lah ban buh doctor ha kitei ki unit kiba donkam ha katei ka jaka sumar jong ka sorkar.
U la ong ruh ba ka Ri-Bhoi ka de ka Aspirational District, kaba ka sorkar ka phai khmat kypang ha kaba ïadei ban ki kam pynroi ha baroh ki lang kynthup ruh ïaka tnad ka koit ka khiah, hynrei kumba long mynta ka tnad ka koit ka khiah ka don hapdeng ka jingeh kaba khraw bad ki paidbah ki ju kynduh jingeh bunsien namar ka jingbym don thikna ki doctor, bad kumba la ioh jingtip da ka seng ki don tang 3 ngut ki doctor paediatricians ha kane ka jaka sumar, bad ka long kaba shitom ïaki namar ka jingkhia jong ka kam ba ki hap ban peit ruh sha kiwei ki unit kum ka SNCU, NRC bad wat sha ki kamra kha khyllung, bad kane kala wanrah pat ka jingeh ïaki paidbah kiba leit shim dawai namar teng teng ki doctor kim lah shuh ban shong ha OPD namar ka jingbunkam.
U la ong ruh ba dei na kine ki daw ka jing bym don doctor thikna ba sa mih ki jingjia ba sngewsih, namarkata naka liang ka seng kala kyrpad ïaka sorkar ba ka dei ban phai khmat kyrpang ïa kane ka district bad lada donkam naka liang ka seng kala pynkhreh ruh ban leit kynduh ïa u Myntri ba dei peit ïaka tnad ka koit ka khiah ka sorkar jylla ban thung ïaki doctor ba thikna bad kiwei kiwei ki post ba dang lait kum ka Additional DMHO, District Malaria Officer bad ki doctor sha ki PHC bapher bapher.
Shuh shuh u la ïathuh ruh ba naka liang ka DMHO kala pyntip sha ka seng ba naka liang ka ophis kala dep ban pynbna ïaki post ha kaba ïadei bad ka jingdonkam ïaki Medical and Health Officer ha SNCU & NRC bad kumjuh ruh ha Barapani State Dispensary UHWC bad Umran Dairy UHWC hynrei ym satia kiba wan thep lait noh tang uwei.
Kumta ka sorkar ka dei ban wad kiei ki daw bala pynlong ïaki samla kiba pyndep ban pule doctor ban kyntaid ban thep kam bad ka sorkar ka dei ban shimkha ïa kane ka mat bad ba ki paidbah kim dei ban mad jngeh haba ki leit sha ki jaka sumar.
Sa peit ruh
