Khliehriat, Jymmang 20: Kum ka jingkyrshan ia ki paidbah nongshong shnong ka Daistong bad ki seng bhalang kiba la pyrshah jur ia ka Shree Cement ban wan buh Cement Plant bad ba la thmu ban pynlong ia ka Public Hearing ha ka 22 tarik u Jymmang, ka party VPP na Jaintia Hills ruh mynta ka sngi ki la pynlong da ka jingiakhih ba jai jai ha phyllaw ka ophis u Deputy Commissioner ban pyrshah ia katei ka Shree Cement bad ruh ban dawa ban pynsangeh ia katei ka Public Hearing.
Ha kane ka jingiakhih ka party VPP nalor ki paidbah kiba la wan ban kyrshan, la don ryngkat ruh u President ka VPP East Jaintia Hills District u Bah Damewanhi L. Rymbai, ki MDC ka VPP ba kynthup ia u Bah Soki Lapasam, ka Kong Deiwi Tongper, u Bah Daemi Liam bad u Bah A. Andriew Shullai, uba dei u Nongialam ka liang pyshah na ka VPP ha JHADC.
Na ka liang ka party VPP ha kane ka sngi ym tang ba pynpaw ia ka jingiakhih ban pyrshah ia katei ka Shree Cement, hynrei ki la ai ruh da ka Dorkhas sha u Deputy Commissioner ka East Jaintia Hills ban pynpaw ia ka jingpyrshah ia ka Shree Cement bad ruh ban kyrpad weng ia ka Public Hearing kumba la pyrshah da ki paidbah.
Haba kren ruh ha katei ka sngi, kitei ki nongialam ka VPP bad ki MDC ki la pynpaw ia ka jingsngewkhia ban iohi ia ka jingpynibor ki bor synshar District khlem da sngap ia ka jingpyrshah u paidbah bad ki la pyrshang pynban ban leh da ka bor bad kaba kham sngewsih ka long ba u DC um shym la treh ban ia kren ne ai jingtoh.
Shuh shuh, ki la byrngem ruh ba ka VPP kan dang bteng da ka jingiakhih kaba tyngeh lad ka ophis u DC ka pyni da ka bor ban pynlong beit ia katei ka Public Hearing bad na ka laing ka party kan dang shim da ki jingiakhih kiba tyngeh ban pyrshah ia katei ka Public Hearing ka shree Ceemnt kumba la pyrshah jur da ki paidbah.
Sa Peit Ruh |
