Nongpoh, Jymmang 12: Kum Shibynta ban ai burom ïaki longkmie kiba long ki risot kiba khlaiñ jong ka iing ka sem bad kumjuh jong ka Imlang ka Sahlang, Ka National People’s Party lyngba ka National People’s Women’s Front (NPWF) Ribhoi District hynnin ka sngi ka la rakhe kyrpang ïaka sngi kyrpangjong ki Longkmie lane ka Mother’s Day haka Shnong Amjong, Ribhoi District.
Kane ka jingïarakhe ka long kyrpang eh naka bynta ki longkmie kiba shong ba sah ha ki shnong khappud kiba kynthup haduh 14 tylli ki shnong kiba hap hapoh ka Tiwa Area. Ka jingthmu jong kane ka prokram ka long ban pynpaw ïa ka jingsngewnguh bad ban ai jingïaroh ïa ka bynta kaba khraw jong ki kmie ha ka jingtei ïa ka longïing longsem kaba skhem.
Ha kane ka sngi naka liang ka NPWF, Ribhoi District ki la pynkup Burom daki jaiñ sha ki 56 ngut ki Longkmie kiba la kynjoh sha ka 70 snem shajrong kaba long ruh kum ka dak ban ai burom ha kum kane ka sngi Kyrpang.
Ha katei ka jingrakhe ïaka International Mother’s Day la wan ban ïa shimbynta lang da u Myntri ka Sorkar ka Jylla u bah Sosthenes Sohtun uba long ruh kum u MLA ka Jirang Constituency, U Bah Charles Marngar MLA ka Mawhati, Ka Kong Rona Khymdeit MDC ka Nongpoh, u Dominic Uphing Maslai, MAC, (EM) ka Karbi Anglong Autonomous Council (KAAC), kong Wanmon Marbaniang President NPWF Ribhoi, lem bad kiwei kiwei ki dkhot ka NPWF jong ka jylla.
La ai jingkren ruh ha kane ka sngi da u Bah Sosthenes Sohtun uba long u myntri sorkar ka jylla bad ryngkat kitei kiwei ki nongmihkhmat bad Nongïalam, ha kaba ka phang pdeng kaba ki la kren ka long ba ngi donkam ban ai ka burom kaba kyrpang ïa ki Longkmie, namar ki Longkmie kim dei kita kiba saindur tang hapoh ki ing ki sem bad ki don ruh ka bynta kaba khraw ban saindur ruh ïa ka imlang ka sahlang.
