Khliehriat, Ïaïong 20: Halor ka jinglap ba la don biang ka jingkylla rong ka wah Prang ha East Jaintia Hills kaba la ju jia man la u snem, ka KSU South West Border ka la pynpaw ïa kata ka jingsngewkhia kaba jur ba la don ka jingkylla rong biang katei ka wah ha kine ki khyndiat sngi bad kaba la ju jia ruh man ka por bad khamtam ha ka por ba slap ha kaba la suba ba ka lah ban don kano kano ka jingpynlait jaboh sha kane ka wah.

Ka KSU South West Border ka la pynpaw ba kane ka jingkylla rong katei ka wah Prang kan sa ktah jur ïa kane ka wah khamtam ki dohum ki dohwah kiba don ha kane ka wah ki lah ban iap noh bad ym tang katta kane ka kan ktah ruh ïa ka koit ka khiah ki paidbah ba bun na ki ki ju pyndonkam ïa kane ka wan ban bam dohkha bad ruh ban sum ban sait.

Na ka liang ka KSU South West Border Circle ka la buh ïa ka jingdawa kaba mardor ïa ka sorkar bad khamtam ïa ka Meghalaya State Pollution Control Board ba kin shim khia mardor ïa kane ka jingkylla rong ka wah bad ki la dawa ruh ba dei ban wad bniah ban lap ïa ka daw ka jingkylla rong kane ka wah bad lada la ïa kiba don kti dei ban leh da kaba tyngeh.

Ka seng ka la dawa ruh ïa ka sorkar ba dei ban shim khia mardor da ka sienjam kaba tyngeh ban khanglad ïa ka jingjaboh kane ka wah bad ban pynlong ruh ïa kane ka wah kaba shngaiñ ïa ki dohum dohwah bad wat ïa ki paidbah.

Shuh shuh, na ka liang kane ka seng ka la ka la rai ruh ban buddien ïa kane ka jingkylla rong kane ka wah bad ban shim da ka sienjam kaba tyngeh lada ki bor sorkar kim shim khia mardor ban peit halor kane ka jingkylla rong ka wah.