Nongpoh, Risaw 13: Da ka mynsiem ka jingsngewkhia bad ka mynsiem ka jingsngewsih khtang, da ki hajar ngut ki paidbah ki la mih paidbah ban pynpaw ia ka jingpyrshah kaba jur, kaba dei halor ka jingshah dkhat jubor kawei ka Heprit ba 13 snem da uwei u runar kaba dang shu dep jia shen ha kawei na ki snong ha Ri Bhoi District.

Ki 42 tylli ki shnong hapoh ka shatri jong ka Joint Action Committee, kiba dei ki nongsysnhar shnong ha Ri Bhoi ki la ia mih paidbah mynta ka sngi naduh ki khynnah skul, ki samla, ki longkmie ki longkpa, ki nongialam shnong bad ki nongialam Seng bhalang ban iaid paidbah na ka bynta ban pynrem jur ia u runar uba la dkhat jubor ia ka jingim ba kordor jong kawei na ka Heprit bad ban leh ia ki kam bymman.

Ha kane ka jingiaid paidbah la shim bynta ruh naduh ki nongialam ka KSU, RBYF, HYC, HANM ha ryngkat ki paidbah ,ki la iaid paidbah ban dawa pynshitom jur ia u runar uba la leh ia katei ka kam pohjaid kaba ktah shisha ia ka imlang ka sahlang.

Kum ki paidbah ha kane ka sngi, ki la mih ban pynpaw ruh ia ka jingsngewlem ia ka longing jong katei ka heprit kaba la duh ia la ka jingim bad ha kajuh ka por ruh ban dawa na ki bor ka ain ba dei ban pynshitom da ka jingpynsajaka  kaba jur ia u runar.

Ha kane ka sngi ym tang ba ki la iaid paidbah ban pynrem jur halor kane ka jingjia, hynrei ki la pynlong ruh ia ka jingthang mombati ha ka por janmeit ban buh ka jingduwai ba kyrpang na ka bynta ka jingjahthaid kaba bym ju kut jong katei ka heprit ha ka khet ka jong u Blei.

Ki kyntien kiba khor na ki paidbah kiba la ia pyrta bad ki nongai jingkren, ha kane ka jingiaid paidbah ka dei ym tang ba ki la dawa ban pynshitom jur ia une u runar, hynrei ki la dawa ruh wat ban phasi ia kum kine ki jaid briew kiba la iap ka jingtip lem khlem da pyrkhat shuh ia ki khyllung khynnah bad ia ki mynsiem briew ba kordor.