Nongpoh, Risaw 01: Ka Party NPP Ri Bhoi District ryngkat ka NPYF bad NPWF bad na ki Block mynta ka nsgi ka la pynkup burom ia u Bah Sosthenes Sohtun hadien ba ka sorkar jylla ka la ai bhah ban don lang ha ka kynhun ki Myntri sorkar ka jylla, kaba long kum shi bynta ban pynpaw ia ka jingsarong ba ka Ri Bhoi District ka la ioh ia u myntri sorkar uban shakri lem ia ka Ri Bhoi bad ha ka jylla hi baroh kawei.
Ia kane ka jingpynkup burom la pynlong ha Parish Hall, Nongpoh, ha kaba la don ryngkat naduh u MLA ka Umsning u Dr. Celestine Lyngdoh, u MLA ka Umroi u Bah Damanbait Lamare, u MLA ka Mawhati u Bah Charles Marngar, ka MDC ka Nongpoh ka Kong Rona Khymdeit, u President ka NPP Ri Bhoi u Bah Clement Mawlong, ki nongialam na ka NPYF bad NPWF ryngkat kiwei kiwei ki nongialam bad ki dkhot ka NPP na Ri Bhoi District.
Kum ban pynkynmaw, u Bah Sosthenes Sohtun, MLA bad MDC ka Jirang u la ioh rung ha ka kynhun ki myntri sorkar ba la pynbujli dang shen hapoh ka jylla bad u Bah Sosthenes Sohtun u la ioh bat haduh lai tylli ki tnat treikam sorkr ba kynthup ia ka C & RD, GAD bad SAD.
Da ka mynsiem ka jingsarong na ka liang ka party ka la pynkup burom bad la ai ryngkat ki jingai sngewbha ha rygnkat ka jingkitbok kitrwiang ia u Bah Sosthenes Sohtun ba un dang lah ban trei kham bha ban wan rah ka jingkylla ha ka jylla bad khamtam ban peit kyrpang ruh ia ka Ri Bhoi District.
Haba kren ha kane ka sngi, u Bah Sosthenes Sohtun u la ai khublei ia ka NPP party na Ri Bhoi bad kynthup ruh ka NPYF, NPWF bad baroh ki nongialam, kiba la ai burom ia u kum uta u Myntri sorkar ba thymmai bad ryngkat ka jingkitbok kitwriang jong ki.
U la ong ruh ba ka jingjied u Myntri rangbah ia u ban long kum u myntri sorkar kam dei satian tang ia u marwei bad ka thew lang ia baroh 4 ngut ki MLA NPP na Ri Bhoi. U la ong ruh ba dei lyngba ka jingkyrshan ki MLA NPP na Ri Bhoi ryngkat ki nongialam ka NPP kum ka Parent Body, ka NPYF bad NPWF ba u la ioh ban bat ia kane ka kyrdan myntri sorkar ban don lang kata ka jingiatrei lang ban kyntiew ia ka Ri Bhoi bad ha ka jylla hi baroh kawei.