Nongpoh, Lber 12: Uwei u rangbah briew uba naka shnong Umsaw Nongkharai u bah Tony Shylla long ruh kum u secretary shnong jong katei la shnong hynnien ka janmiet ha ryngkat bad katto katne ngut ki samla u la ïoh ban shimti ïa u mrad Slowloris naki nongñiah truck bad rah pat sha ïing daka jingthmu ban ïada ïa utei u mrad naki briew shim kabu.
Ban ai jingiada ia une u kynja mrad, mynta ka sngi pat utei u rangbah u la wan rah ïa itei u Mrad Slowloris ban aiti pat sha ka kti jong ka tnad forest wildlife khnang ba kin ïoh ban leit buh pat ïa utei u mrad sha ki jaka ba kham pajih na ki shnong.
Haba kren naka liang u bah Tony Shylla, u la ïathuh ba hynnien ka miet ki Nongñiah Truck daka jingtieng ki la wan ban ïathuh ïa u ba utei u mrad u la rung hapoh ka truck jong ki bad ban shong rieh tngen. Kumta naka liang jong u lem bad ki samla ki la leit ban khmih bad lap ba dei da u mrad Slowloris.
U la ïathuh ruh, mar mar kumta hi u la shim ïa utei u mrad bad ban rah sha la ïing khnang ba un ïoh ban aiti pat sha ki tnad forest khnang ba une u mrad uba la jan duh jait un ïoh iaka lad ban im.
U bah Tony Shylla u la ong ruh, kane ka jingmih klumar jong ki mrad lehse ka lah ban dei lyngba ka jingthang khlaw pathar da ki briew kaba pynlong pat ïaki mrad ba kin mih klumar sha ki jaka paidbah namar ba kim don shuh ïaki jaka rieh tngen.
U Bah Tony Shylla kum u Nongshong jong ka them Ribhoi, u buh la jingkyntu ïaki paidbaha ba kim dei ban thang pathar ïaki khlaw ki btab namar ka lah ban pynduh jait ïaki mrad kiba Im haki khlaw namar ba kim nym don shuh ïa ki jaka rieh tngen.
