Nongpoh, K’lyngkot 06: Kumba ki Pulit ka Ri Bhoi ki ju pyrkhing bha ia ki Kali ba pynkheiñ ain ha ki surokbah na ka bynta ka jingshngain ki paidbahha ka leit ka wan bad mynta ka sngi ruh ki pulit Traffic ka Nongpoh Brach ki la bteng ban talasi ia ki kali paidbah bad bun ki Kali ba pynkheiñ ain ki la shah dain kuna katkum ki kyndon ain.
Kum ka jingbteng ban ai jinghikai ia ki nongniah kali ba ki hap ban bud ia ki kyndon ain niah kali, ki Pulit Traffic ka Nongpoh Branch ki la pynlong ia ka jingtalasi kali ha Umling, ha kaba ki la bat naphang ia ki Kali ba pynkhein ain bad ruh ryngkat ka jingdain kuna.
Ha kane ka jingtalasi kali ba kynthup naduh ki Kali heh bad ki Kali rit, ki pulit ki la ioh ban dain kuna haduh T. 30 hajar na kito ki Kali ba pynkhein ain bad na ka liang ki Pulit ki la rai ban dang bteng ka jingtalasi kali ha kaba ka thong ka long ban shngain ki paidbah nongleit nongwan lyngba kane ka surokbah ha Ri Bhoi.
