Shillong, Nailur 18: Ka Federation of Khasi Jaiñtia and Garo People (FKJGP) Upper Shillong Circle mynta ka sngi ka hapoh ka jingialam jong u Samla Kitboklang Nongphlang, President FKJGP Upper Shillong Circle ha kaba la synran lang da da kiwei ki nongialam ki Unit ka FKJGP Upper Shillong Circle kila leit ban iakynduh ia u General Manager ka NHIDCL ban dawa ba ki company bapher bapher kiba pyntrei ia ka surok fourlane naduh Umshyrpi ter ter kidei ban pynsted noh ia ka kam khnang ba kan ym ktah ia ka leit ka wan jong ki paidbah kiba iaid lynti na katei ka surok bah.
Na ka liang jong u General Manager ka NHIDCL u la ai ka jing pyntikna ba la kumno kumno kin pyrshang ban pyndep noh ia ka jingtrei ha ki bynta jong ka thaiñ Upper Shillong ha u bnai Nohprah 2025 lane ha u bnai Kyllalyngkot 2026.
Ha katei ka sngi na ka liang jong ka FKJGP Upper Shillong Circle kala dawa ruh ba ki company/ contractor kidei ba maramot kloi ia ki katto katne tylli ki bynta kiba la ktah shikatdei eh ia la leit ka wan jong ki paidbah lyngba ka jingdheng kali kaba shyrkhei khamtam ha ki sngi Nyngkong, sngi thohdieng bad sngi saitjaiñ kaba pynsyrtok ia ki nongleit nongwan khamtam hi ki bynta jong ka Umshyrpi haduh Ladlummawbah, ki bynta jong ka Shnong Sawmer hajan Sunny site, ki bynta ha lad jong ka Shnong Mawklot bad lad Lum Shyllong, ki bynta jong ka 7mer hajan Elephant Falls, ki bynta jong ka Shnong Pomlum hajan jong ka PHC bad kumjuh ruh ki bynta jong ka shnong Bañiun ban leit sha Mylliem.
Ka seng kala shimkhia ban kren ia katei ka bynta namar lyngba ka jingdheng kali kaba shyrkhei khlem pep kan sa ktah ia kiba bun ki samla pule kiban sa ialeh ia ki Examination bapher bapher ha kine ki khyndiat bnai kiban sa wan. Na ka liang jong u General Manager ka NHIDCL ula ai ka jingkular hakhmat ki nongialam jong ka seng ba un sa btah mardor iaki Companies/Contractors ba kin leh ia kaba donkam bad ba kin sa pynlong ruh ia ka jingleit jurip ha ryngkat ki nongialam jong ka seng khnang ba kan pynsuk iaka leit ka wan jong ki Piadbah.
Ka Seng kala dawa ruh na u General Manager jong ka NHIDCL ba udei ban bthah ia ki Companies/Contractors ban pyntikna ba ki nong trei bylla bar jylla kidei ban pynbiang iaki kot ki sla kiba biang bad ba dei ban pyrkhing namar ba ym lah ban tip ba ioh lehse ki mynder kiba la shah kyndang na ka jylla Assam kin ioh ban riehtngen bad ban sah duh ha ka thaiñ Upper Shillong ha ka dur jong ki nong bylla sngi. Ha kaba iadei bad ki nongtrei bar jylla na ka liang jong u General Manager ka NHIDCL u la kular ban ai ka jingiatreilang bad ka seng khnang ba kan ym don satia kano kano ka jingdkoh jong ka kam ban pyntrei ia katei ka surok bah.
Ha kajuh ka por na ka liang jong ka seng kala kyntu ruh ia baroh ki Dorbar Shnong ba kin long kiba peitngor bha bad kumjuh ruh ban ai ka jingiatreilang bad ka seng ha kaba iadei bad ka jing wan buhai shnong jong ki briew kiba nabar bad kumjuh ruh ban teh lakam ia ki kam sniew kiba la sdang ban kynrei ha ka thaiñ naduh ki kam tuh kam thiem bad kumjuh ruh ban pyrkhing ia ka jing jyllei jong u Drugs ym tang ha ka thaiñ hynrei ha ka Bri u Hynñiewtrep bad ha ka jylla hi baroh kawei.
