Shillong, Rymphang 13: U Myntri Rangbah ka sorkar jylla u Conrad K. Sangma, mynta ka sngi, u la leit ban plie paidbah ia ka Eklavya Model Residential School (EMRS) ha Samanda, Rikwarenggre, East Garo Hills District.

Lyngba jong katei ka sngi ba la plie ia katei ka skul EMRS, nalor ka jingdon u Myntri Rangbah, la sakhi ruh da ka jingdon u nalor ka jingdon u Marcuise N. Marak, Myntri ka tnat PHE bad Soil & Water Conservation, u R.Parak, Deputy Commissioner ka East Garo Hills, ki ophisar sorkar, ki khynnah pule ha katei ka skul, ki kmie ki kpa lem bad kiwei.

Kumba ka long mynta, katei ka skul EMRS ha Samandar, ka dang ai jinghikai ia ki khynnah haduh ka Class VIII, ha kaba la ha ki snem ki ban dang wan yn nangkyntiew pat sha ki Class kiba kham shaneng.

U Conrad K. Sangma, haba u ai jingkren ha katei ka sngi, u la ong ba naduh u snem 2018, ka sorkar ka la pynleit jingmut bha ban kyntiew ia ka pule puthi bad halor kata, ka sorkar ka la ialeh ban pynbha ia ki jaka pule jong ki heprit, kata ha ka kyrdan Lower Primary bad Upper Primary, ha kaba u la ong ruh ba kumba ka long mynta la jan 80 percent, ba ka sorkar ka la lah ban pynioh building thymmai ha ki kyrdan LP bad UP.

Shuh shuh, u la ong ruh ba Meghalaya ka la ïoh haduh 38 tylli ki skul EMRS ha kylleng ki District ha ka jylla bad halor kata u la ai jingiaroh ia ka ka tnat Ministry of Tribal Affairs bad khamtam eh ia u Narendra Modi, Prime Minister, namar ka jingkyrshan ia ka jylla.