Maham ïa ki Politishan bad ki heh spah ba kdup ïa ki bar jylla

Shillong, Risaw 13: Ha ka kyrwoh kaba la phah da u Bah Sainkupar Nongtraw, General Secretary jong ka kynhun Seng Kiengatiar Hynniewtrep National Leberation Council (HNLC), u la ong ba ka HNLC ka shim ïa ka jingkitkhieh jong ka jingleit buh ïa u Bomb IED ha phyllaw ka iing jong u Ma Nehlang Lyngdoh, kaba don ha Umsning, Ri Bhoi.

Katei ka jingbuh Bomb IED ha phyllaw ka Iing u Ma Nehlang Lyngdoh, ka long kum ka dak ba ka seng ka ïakhih halor ka jingshah banbein bad thmu pynïap ïa ka Jaidbynriew da ki katto katne riew sainpyrthei bad ki nongkhaii kiba bamsap bad kiba ju ïada bad pynkup bor ïa kiwei kiba nabar, kaba wanrah pat ïa ka jingduhnong ïa ki briew jongngi kiba dei ki trai ri trai muluk.

Ka HNLC ka la phah ruh ïa ka kyrwoh, kaba long kum ka jingpynkynmaw sha baroh ki nongmihkhmat paidbah, kiba la jied da ki paidbah, la ka long ïa kiba mynta ne ïa kiba rim, ba kim dei ban dei ban die ne pynlong mar khaii ïa ka jingshaniah jong ki paidbah, hynrei ki dei ban long ki nongïada ïa ka khyndew ka shyiap, ïa ka jinglong tynrai ka jaidbynriew bad ba kim dei ban shu pyndem ïalade, tang mar ka jingpyntoi shimet ne jingmyntoi ha ki kam sain hima sima.

“Ngi la khmieh bniah da ka jingsngewkhia, ha kaba la don ki katto katne ki briew kiba dei ki breiw jong ki Politishan, kiba dang bteng ha ka pyndonkam bakla ïa ka bor kaba ki bat, kata da kaba ki ai jaka riegtngen ïa ki bar jylla, da kaba ai ruh sha ki ïa ka khyndew ka ka shyiap bad kyrshan ïa ki bar jylla, ha kaba kane ka jingleh da ki briew sain hima sima, ka wanrah jingma kaba khraw ïa ka lawei jong ki khun jong ka bri u Hynniewtrep” ong ka Kyrwoh ka HNLC.

Ka HNLC ka ieng ha ka nongrim bad ïada bad ban pynioh ïa ka hok bad ka burom ha ka bri u Hynniewtrep, namarkata ngin sa thad madan ïa baroh kiba bamsap, da kaba sei madan ïa ka kyrteng bad ban pynjah burom ïa kito kiba ju ïatreilang bad ki briew kiba nabar, khnang ba ki briew ha ka bri u Hynniewtrep ba ki tip bad ba kin nang ban husiar na kiba kum kita ki briew, kiba jied ïa ka jingmyntoi kaba shimet ban ïa ka jinglong ba shida ne ka jinglong ba ïaineh.

Ka seng ka la pynkynmaw ruh ba ki bor synshar ba ki dei ban leh ïa kano kano kaba hun u paidbah Hynniewtrep bad kim dei ban leh ïa kano kano ka kam kaba pynsngewbha ïa ki briew nabar ne ki bar jylla bad kino kino kiba leh ïa kano kano ka kam kaba long pyrshah ïa ka jingmyntoi ka Jaidbynriew kim don hok ba ki long kum kita ki nongïalam ka ha ka Jaidbynriew bad ba nangne shakhmat ka HNLC, kan ïaleh pyrshah beit ïa kito ki khwan myntoi shimet bad khlem da khein la ki dei ki briew kiba don ha ka bor ne ym don ha ka bor.