Nongpoh, Nailur 03: Tang na ka daw ka jingbym ioh ia khun ki 4 ngut ki rang ialehkai kiba la shah kyntait hadien ba la leh ia ka Tw3 Test, ka kynhun ialehkai ka Mawtneng UP&SS Mawtneng kaba mihkhmat ia ka jylla ha ka under-15 category ka la duh noh ban ialehkai ha ka Subroto Cup International Football Tournament 2025 kaba hap ban ia khun pyrshah ia ka Gujarat ha ka 2 tarik u Nailur 2025 ha Bangalore.
Kitei ki 4 ngut ki rangialehkai kiba la shah kyntait lyngba ka TW3 Test ban ioh ia khun ha kane ka lympung Surbroto Cup ki kynthup ia u Malong Bey, u Arki Bauni Jalong, Medawanpura Shylla bad u Jerius Lyngdoh bad tang na ka daw ka jingshah kyntait kitei ki 4 ngut ka la pynlong ia ka kynhun baroh kawei ban duh syndon ban ialehkai ha kane ka Subroto Cup International Football Touranemnt kaba long ha Bangalore.
Haba ioh ban ia kren bad u Bah Iohbor Jalong uba dei u Coach ka Mawtneng UP&SS, u la ong ba kane ka jingduh ialehkai ka kynhun kam dei satia ka jingbakla na ki bor pyniaid skul ne na ka Directorate of Sport, namar shuwa ban leit shatei la dep ban leh ia ka Screening kaba paka bad dei hadien ba la leh lyngba katei ka TW3 test ba kitei ki 4 ngut ki shah kyntait bad katkum ka kyndon jong ka Subroto Cup shisien ba la shah kyntait haduh 4 ngut kano kano ka kynhun ruh kan nym ioh shuh ban ialehkai.
U la pyntip ruh ki kynhun kiba la duh ban ialehkai hadein ba la leh ia katei ka Test kim dei satia tang ka Mawtneng bad ki don haduh 21 tylli ki kynhun na kylleng ki jylla kynthup ia ka Mawtneng kiba la shah kyntait bad tang 13 tylli ki kynhun kiba ialehkai mynta u snem hadien ba la leh lyngba katei ka TW3 Test.
Shuh shuh, u la bynrap ruh da kaba ong, kane ka jingduh ialehkai ka kynhun ka la pynsngewsih bha ia kitei kitei ki rangialehkai bad kynthup ruh wat ia ki bor pyniaid skul bad wat ia ka Directorate of Sport ha kaba kim poi pyrkhat ban shah kyntait, namar naduh ba sdang la don kata ka jingiatrei lang bad dei tang hadien ba la leh ia katei ka TW3 Test ha ka 1 tarik u Nailur bad ka la pynjew noh ha ka miet jong ka 2 tarik ba ki 4 ngut ki la shah kyntait hadien ba la dep leh ia katei ka test.
