Nongpoh, Jymmang 21: U Deputy Commissioner ka Ri Bhoi, u Abhilash Baranwal, mynta ka sngi, u la leit ban plie paidbah noh ia ka ‘Treilang 2026 – Inter-Village Development Championship’, ka prokram kaba la pynlong da ka ophis u Sub-Divisional Officer (Civil), Patharkhmah Civil Sub-Division bad ka jingthmu jong katei ka prokram, ka long ban wanrah ia ka jingiatreilang hapdeng jong baroh ki shnong kiba don ha Ri Bhoi Sepngi bad kumjuh ruh ban kyntiew ha baroh ki liang ia ki shnong kiba hap hapoh ka Patharkhmah Civil Sub-Division.
Haba plie ia katei ka prokra, la pynlong ha phyllaw ka Patharkhmah Model Degree College, ha kaba la sakhi da ka jingdon u u Chaitanya Awasthi, SDO ka Patharkhmah Civil Sub-Division, u Dr. Hajong, BDO Jirang Block, kiwei ki ophisar sorkar, ki nongialam shnong lem bad ki riew paidbah na ki shnong bapher bapher kiba don ha katei ka thain.
Lyngba jong katei ka sngi ba la plie ia katei ka prokram, la sakhi da ka jingwanïashim bynta shitrhem naduh ki nongialam shnong, ki riew paidbah bad samla, ha kaba ka jingwan iashimbynta bad kyrshan jong ki ia katei ka prokram, ka long pynkhlaiñ ïa ka jingiadei hapdeng ki para nongshong shnong ka thain, kata ban kyntiew naduh ha ki kam ialehkai, ki prokram kolshor lem bad kiwei kiwei ki jingiakop.
Ka “Treilang 2026” kan bteng naduh u bnai Jymmang haduh u Naiwieng mynta u snem bad kan kynthup ïa bun jait ki jingïakob kum ki sports, tug of war, jingiakop shad bad rwai, arts and crafts lem bad kiwei kiwei.
Ha katei ka sngi, ba la sdang katei ka prokram, ka ophis jong u SDO, Patharkhmah Civil Sub-Division lem bad ka ophis jong u BDO ka Jirang Block ki la pynkup burom ruh ïa u Abhilash Baranwal, IAS, halor ka jingshakri jong u kum u Deputy Commissioner ka Ri-Bhoi District, ha shuwa ba un mih noh na ka district ban leit shimti kum u Deputy Commissioner ba thymmai ka East Khasi Hills District.
Sa Peit Ruh
