Sohra, Jymmang 29: Wat la ha kine ki khyndiat bnai ne khyndiat sngi ka la don ka jingkynthoh pyrshah ia u Bah Ardent Miller Basaiawmoit kum u President ka VPP Party, kaba dei halor ka kam syiem jong ka Hima Sohra, hynrei mynta ka sngi na ka liang une u nongialam u la hiar sha sohra ban pynshai sha ki paidbah halor ki nongrim treikam ka party VPP kaba khlem da leh shiliang iano iano ruh.
Kumba la sakhi mynta ka sngi, u Bah Ardent Miller Basaiawmoit kum u khlieh nongialam ka party da lade u la hiar sha Sohra ban pynshai sha ki paidbah halor ki nongrim treikam ka party bad kaba kham sngew phylla pat ka long ba ki paidbah ym tang ba ki wan ban sngap iaka jingkren jong u ha katei ka jingialang, hynrei ki la ai ruh ka jingkyrshan da kaba ia noh synniang pisa ba la shuh pynap ha ka jain tymmoh khlieh kaba long kum ka jingkyrshan ia ka VPP party.
Haba kren ruh ban pynshai halor kam syiem ka Hima Sohra, u Bah Ardent u la pynshai sha ki paidbah ba ka thong jong ka Party VPP ka long ban pynim, ban pynneh pynsah bad ban saindur (To Revive, restore and to transform) da kaba ong ruh ba ka Party VPP kam tuklar ia ka kam Syiem ha ka Hima Sohra la ka dei ban jied iano iano ruh, hynrei ka party VPP ka pynksan ba ka rai kaba khatduh ka dei ka rai jong u paidbah.
Shuh shuh, u la kren ruh halor ki bynta jong ka jingsynshar Syiem ha Ri Khasi da kaba ong ba u Syiem ka ri Khasi u Synshar, hynrei um bat ia ka bor synshar, ki long tang ki atiar jong ki hima, kaba maka ruh kam long kaba kut namar kata dei u paidbah bad ha kaba kut namar kata ka dei u paidbah, ha ka jinglong syiem ki syiem Khasi namar kata ki sngewthuh ba ki dei tang ka Hima kaba long jong u paidbah bad nalor ka bor u paidbah ym don shuh da kawei pat ka bor. Kine ki dei kiba saindur ia kata ka synshar paidbah jong u Khasi.
Sa Peit Ruh
