Nongpoh, Nohprah 20: Ka da long shisha ka jingkmen ia ki paid riewngeit  bad ruh ka sngi ka ban sah jingmynmaw pateng la pateng ha ka Balang Presbyterian Nongsangu ba hap ha ka Ri Bhoi Shatei Presbytery ka Ri Bhoi Presbyterian Synod, ba kum ka Balang mynta ka sngi ka la lah ban plie paidbah ia ka ïing Jubili bad ruh ia u Maw sah jingkynmaw ka Jubili ba ka Balang Presbyterian Nongsangu ka la ioh ban rekhe kyrpang ba ka Balang ka la kynjoh sha ka jingiaid lynti kaba la dap 125 snem naduh ba la seng ia ka Balang ha u snem 1900.

Ia kane ka ïing Jubili bad ruh ia u Mawsah jingkynmaw ka jingdap 125 snem ka Balang la wan ban plie paidbah da u Rev. B.B Markhap, uba dei u Moderator ka Ri Bhoi Shatei Prebytery kum u kongsan bad u Bah Charles Marngar MLA ka Mawhati kum u symbut kongsan.

La sakhi lang ruh ha kane ka sngi da ka jingdon lang u Rev. B.R Pamshong, u Rev. R.R Lymba, u Rev. B.B Khykdeit, u Tbn. B.K Tmung, u Tbn. KS Lyngdoh, ki rangbah Balang bad ki paid riewngeit ka Balang Presbyterian Nongsangu, kiba la ioh ban ia lehkmen bad ai ka burom kaba khraw sha u Blei ba la lah ba plie ia ka ïing Jubili bad u Maw Sah jingkynmaw ka Jubili.

Ha kane ka sngi, nalor ki nongkren kiba la kren shaphang ka jingiaid lynti kaba 125 snem ka Balang ba kum ka Balang ka la mad lyngba shibun ki jingtynjuh bad ki jingeh, la pynlong ruh da ka jingduwai ba kyrpang ha kane ka jingplie ia ka ïing jubili bad u maw jubili ba ka Balang kan dang ioh shuh shuh ban pdiang ia ki jingkyrkhu bad ruh ban dang ai ka burom sha u Blei Nongbuh Nongthaw.