Nongpoh, Nohprah 20: Ki pulit jongka Ri Bhoi District hapoh ka jingialam jong u Senior Superintendent of Police, u Vivekanand Singh Rathore ha ka janmiet jongka sngi Thohdieng ki la pynlong iaka jingrakhe lypa iaka jingwan long briew u Jisu Khrist haka pyrthei, ka Advance Christmas ha ryngkat ki khunswet kynthei bad shynrang kiba la ri bad sumar da ka tnad Social Welfare.

Ha katei ka jingrakhe kaba kyrpang kaba la pynlong haka ophis treikam ba thymmai jong u Superintendent of Police ka Ri Bhoi District la wan ban iadon bynta ruh naduh u Bah Paul Lyngdoh, myntri sorkar barim ka jylla, u Abhilash Baranwal Deputy Commissioner ka Ri Bhoi, ki majistor, ki nongialam sengbhalang ba kynthup ia u Bah Bipul Thangkhiew President ka RBYF, u Bah Ferdynald Kharkamni, President ka KSU, u Bah Rayonald Kharkamni, Honorary Secretary ka MCA nalor kiwei kiwei de ki heh pulit na ka District hi baroh kawei.

Ha kane ka janmiet la pynshongshit iaka jingrakhe lyngba ki jingot ia ki cake da ki khunswet kynthei bad shynrang kaba la pynbud pat sa ka jingtem jingput bad jingrwai na ki khunswet, u Bah Paul Lyngdoh lem bad kiwei kiwei de ki nongrwai.

Haba kren ha kane ka janmiet, u Bah Pual Lyngdoh u la ai ka jingiaroh kaba khraw ia ka tnad Pulit na Ri Bhoi kaba la shim ia kane ka sienjam ban pynlong kum kane ka jingrakhe ban pdiang burom ia ka Christmas bad snem thymmai bad khamtam ka tnad Pulit ka la khot kyrpang ruh ia ki khunswet ban ialehkmen  lang na ka bynta ban pdiang ia ka Christmas bad snem thymmai.

U la ong ruh ba ka tnad Pulit na Ri Bhoi, ka dei kawei na ka tnad Pulit ha ka jylla kaba la trei shitom ban pynduna ia jingjia ba sngewsih ha ki surokbah bad kumba la sakhi na ka por sha ka por ka tnad Pulit na Ri Bhoi ia khun pyrshah ban pyrkhing ia kiba pynkheiñ ain na ka bynta ban iada ia kiba bun ki mynsiem ba kordor kiba iaid ba ieng lyngba kane ka suorkbah ha Ri Bhoi Disrtict.