Nongpoh, Jylliew 19:
U Bah Mayralborn Syiem, MLA jong ka Nongpoh konstitwensi mynta ka sngi, ka 19 tarik jong u bnai Jylliew 2024, u la leit ban plie paidbah ia lai tylli ki skhim pynroi ha ka shnong Umjari kiba kynthup ia ka building ba thymmai jong ka Umjari Lower Primary Government School kaba la shna lyngba ka State Scheme, ka jaka leit shabar paidbah bad ka madan phutbol jong ka shnong Umjari, kine baroh ar kidei kiba la shna lyngba ka skhim Special Rural Works Programme (SWRP) 2022-23 ka jong u MLA.
Nalor u Bah Mayralborn Syiem, ha kane ka sngi la iadon ryngkat ruh da u R Rizal, Sub-Divisional School Education Officer (SDSEO) ka Ri Bhoi District, u P Yadav, Block Mission Coordinator ka Umling Block, u Bah Kyrshan Sulein, Rangbah Shnong ka Umjar, ki paidbah nongshong shnong, ki kmie ki kpa jong ki khynnah skul nalor ki dkhot ka Managing Committee bad nonghikai jong ka skul lem bad ki khynnah skul.
U Bah Mayralborn Syiem haba ai jingkren ha kane ka sngi, u la pynpaw ia ka jingsngewkmen ban ioh ban iadon bynta lang ha kane ka sngi kaba la ioh ban plie paidbah ia lai tylli ki skhim pynroi hapoh ka shnong Umjari, kiba long ka jingmyntoi na ka bynta ki heprit kiba pule ha kane ka skul Umjari Lower Primary Government School kiba la ioh ia ka ingskul kaba thymmai bad ruh ia ki paidbah nongshong shnong kiba la ioh ia jaka leit shabar paidbah bad ka madan ialehkai kaba thymmai.
Halor ki jingdonkam kiba la buh bad pynpaw da ki nongialam shnong bad ruh ki nongpyniaid jong ka skul, u Bah Mayralborn Syiem u la buh ia ka jingkyrpad ba kin iai shah shipor ar por, namar na ka liang ka jong u, u la pyrshang ban wad ia ki lad ki lynti ban pynbit pynbiang ia ki jingdonkam baroh kawei hadien kawei, wat lada ym lah ban leh shisien leh ia baroh.
Ha kaba iadei bad ka umbam umdih, u Bah Mayralborn Syiem u la pyntip ba ki paidbah nongshnong ka Umjari lem bad kiwei de ki shnong ba marjan, kin sa ioh ia ka skhim um kaba heh lyngba ka Jal Jeevan Mission (JJM) ka pynioh ia ka umbam umdih kaba paka ymtang ha ka shnong Umjari hynrei wat kiwei ruh ki shnong kiba don marjan, hynrei kumba kane ka skhim ka dang don hapdeng ka jingbuddien ban pynurlong, u la kyntu ia ki paidbah ba kin iai shah shipor.
Na ka liang jong u SDSEP ka Ri Bhoi pat, u R Rizal u la ai ka jingkular ba na ka liang ka jong u ruh, un pyrshang ban thaw ki lad ki lynti ban pynioh ia ki jingdonkam jong kane ka ingskul kaba thymmai, namar ban shu don tang ka ing, khlem ki tiar ki tar ruh kam iahap satia. Kumta u la buh ka jingkyrpad ba watlada ym pat lah ban pynurlong noh mynta mynta, hynrei u kyrmen ba ha ki por kiban sa wan, yn sa lah ban ai ia ki jingdonkam jong ka skul.
