Mairang, Jylliew 19:
Ka Mairang Presbyterian Science College (MPSC) mynta ka sngi, ka 19 tarik u Jylliew, 2024, ka la ioh ban rakhe ia u mawmer uba 18 snem lynter jong ka jingiaid lynti jong ka jingshakri ban pynsaphriang ia ka jingnang jingstad sha ki samla jong ka thain Mairang.
Ka Mairang Presbyterian Science College kaba la seng ki snem 2006-07 daka Mairang Presbytery, kadei ka kolej kaba nyngkong eh ka jylla kaban ai jinghikai beit thik tang ia ki sobjek Saian (Science) bad Jingkhein (Mathematics).
Ha kane ka sngi ba la rakhe ia ka jingdap ba 18 snem lynter lane kata College Foundation Day, la wan ban iadon bynta da u Chief Secretary ka jylla, u Bah DP Wahlang ha ka jingiadon ryngkat jong u Deputy Commissioner ka Eastern West Khasi Hills District, u Bah Gideon Kharmawphlang, u Moderator ka Mairang Presbytery, u Bah GG Lyndem nalor kiwei kiwei de.
Haba ai jingkren ha kane ka sngi, u Bah DP Wahlang, u la pynpaw ia ka jingdonkam ban don ymtang ka kyrdan lane degree, hynrei ban don ia ka jingpynjai ia ka sap ka phong (skill) ban kiew shaphrang ha ka jingim, da kaba bynrap ruh ba ka jingpyntrei ka New Education Policy (NEP) 2020 kan iarap shibun ia ki samla ba kin ioh ia kitei lad ba kin pynjanai iala ki sap ki phong ki jongki ryngkat ryngkat bad ka kyrdan pule.
Utei u heh ophisar ka jylla, u la kyntu ruh ia ki samla ba kidei ban trei shitom da kaba ong ba kidei ban khrehkot katba kiwei ki dang thiah, trei katba kiwei ki dang iaid kai bad ba kin sngewthuh kumno ban don ia ka thong bad ba kin pynurlong iala ka jingphohsniew katba kiwei ki dang pyrkhat.
Shuh shuh, ha kane ka sngi la ioh ruh ia ka jingpynkup burom kaba kyrpang sha ki nongseng jong ka kolej, kiba dei ruh ha kajuh kapor ki dkhot jong ka Governing Body bad ruh ia u samla Kevinstrong Lawriniang, uba la lah ban pass bha bad ioh ia ka kyrdan ha ka ‘Top 10’ ha ka eksamin Higher Secondary School Leaving Certificate (HSSLC) jong ka lain saian kaba dang shu dep shen.
Ha kane ka sngi, la ioh ruh ban pynlait paidbah ia ka jingrwai jong ka kolej lane kata ka College Anthem da u Bah DP Wahlang.
