Shillong, Nohprah 22: Na ka jingsuba ka jingthud ka bording Ilektrik kawei ka ïing ka la pluh ding kynsan ha Mawlai Nonglum bad ha ka jingklang palat ka ding ka la wan rah ruh ka jingbthei kaba la sawa jur na ka jingbthei jong ka Tyndong Gas ba shet jingshet.

Kumba la ioh lum jingtip, kane ka jingjia ka la jia kumba ha ka por 1 baje mynsngi  bad donbok ha kane ka jingjia ym shym la don mano mano ba mynsaw bad lait noh ka jingbam duh ka ding ia ka ïing bad ki jingdon jingem hapoh katei ka ïing.

La ioh lum jingtip ruh ba kane ka ïing ka dei ka ïing ba la shu ai wai ban shong ki briew bad kaba don haduh 3 kynrad ka jaka sah briew bad namar ba de ka ïing dieng ka ding ka la ioh ban klang haduh ban da pynjot kat ban poi ki Kali Pynlip ding.

Halor kane ka jingjia, ki Pulit pynlip ding ruh ki la wan poi mardor sha katei ka jaka ban tem ia ka ding kaba la klang ha katei ka ïing khnang ban iada ba ka Ding kan nym ioh lad ban pur sha kiwei pat ki ïing ba don marjan.