Nongpoh, Nohprah 22: Ban tehlakam ia ki Kali ba pynkheiñ na ka bynta ka jingshngaiñ ki paidbah ha ka leit ka wan lyngba ki surokbah, ki Pulit ka Ri Bhoi ki la pyni shisha ia ka mynsiem jong ka jingtrei shitom khlem da don shuti ne shongthaid wat ha kane ka aiom lehkmen Christmas bad snem thymmai, ha kaba mynta ka sngi ki la hiar baing sha surok ban pynlong ia ka jingtalasi ia ki Kali ba pynkheiñ bad kiba ym bud satia ia ki kyndon ñiah Kali.

Ha kane ka jingtalasi ia ki Kali ba la pynong ha ka surokbah National Highway-6 ha ki bynta jong ka Shnong Quinnine la ialam hi da u Senior Superintendent of Police ka Ri Bhoi u V.S Rathore bad u Additional Superintendent of Police u Bah Orville Massar lem bad kiwe kiwei ki pulit na Nongpoh bad Umsning Traffic Branch.

La sahi ruh ba ha kane ka jingtalasi ia ki Kali, ki Pulit ki la tar lut ia ki Kali ba tah ïit ïong khlem da map satia bad ha kane ka jingtalasi la lap ruh 2 tylli ki Kali kit Pisa ki Bank ba la pyndait Siren khlem ka jingthoh ne jingbit  ha kaba u SSP ka Ri Bhoi u la phah loit noh ia ki Siren jong kitei ki Kali ba pyndonkam da ki Bank.

Ha kane ka jingtalasi, kaba kham phylla ka long ba don ruh ki Kali ba shim kabu da kaba pyndonkam ia ki jingthoh ba la thoh Government of Meghalaya ha trai jong ki number plate khlem da don satia ki heh ophisar bad na ka liang ki Pulit ki la pyndam ruh ia kitei ki jingtoh ba thoh Government of Meghalaya ha ryngkat ka jingmaham kaba jur ba kim de ban pyndonkam bakla ia ki Kali da kaba shim kabu ha ka kyrteng jong ka sorkar.