Shillong, Nohprah 22: U MLA ka Shillong North Constituency u Bah Adelbert Nongrum hynne ka sngi u la plie paidbah iaka Triangle Junction kaba don ha Lad ban leit sha Lawmali Hospital.

Ia kane ka Triangle Junction la dep ban shna bad pynitynnad thymmai ha ka jinglut kaba ym duna T.10 lak ba kynthup ka jingker thymmai bad ka jingsiang rong iaka surok.

Ha kane ka sngi la don lang ki Executive Member jong ka Dorbar Shnong Lawmali Pyllun, ki paidbah bad ki nongmihkhmat naka tnat PWD ka Sorkar Jylla bad SRGT.

Haba kren ha kane ka sngi u MLA ka North Shillong Constituency u Bah Adelbert Nongrum, u la ong ba iaka Triangle Junction la thmu lypa ban tei pynthymmai naduh u snem 2021 hynrei namar katto katne ki daw kane ka kam, kam shym la iaid shakhmat.

U Bah Adelbert u la ong ba ka daw ban tei thymmai iaka ‘Triangle Junction’ ka dei kum shi bynta ban pynkham kylluid iaka surok, namar kadei ka surok kaba kongsan da ka jingdon ka Lawmali Hospital bad ka surok ban leit sha Iewduh bad ki thain Jaiaw, Motphran.

“Nga ai khublei iaka Sorkar Jylla naduh u Symbud Myntri Rangbah ba khmih iaka tnat PWD bad kumjuh ruh iaki Contractor kiba la pyndep ia kane kam haka por bala buh” la ong u Bah Adelbert.

Haba ai khublei Christmas ia baroh kiba don haka program, u MLA u la ban ban khia ba donkam ban don ka jingiatylli ban iasyllok iala ki khun samla khnang ba kin lait naki jingshah pynshoi ha kiba bun jait ki kam sniew.

“Kum u MLA ka thain nga kyntu iaki kmie ki kpa ban sneng ban khraw iala ki khun ba kin leh iaka ba dei” u la ong.