Shillong, Nohprah 22: U Nongialam ka Meghalaya Bharatiya Janata Party (BJP) u Bah Hek u la pynthikna baka Party kan iakhun haka ilekshon MDC sha Garo Hills Autonomous District Council (GHADC) 2026.

Haba kren shaki lad pathai khubor u Bah Hek u la iathuh baka Party haduh mynta ka dang peit thuh iaki briew kiba wan pan Ticket ban iakhun haka ilekshon MDC GHADC.

U Bah Hek u la kubur baka BJP kam lah ban iakhun na baroh 29 tylli ki constituency hynrei u la pynthikna ba kan pynieng kyrtong na ki katto ki katne Constituency ba ka don jingkyrmen ban jop.

“Iaka mynta ngi dang peit thuh bad peitngor iaki briew kiba wan pan Ticket jong ka BJP ban iakhun ilekshon MDC  GHADC bad hadien bala bishar bniah ngin sa lah ban pynbna paidbah, mano kita ki kyrtong bad katno ngut ngin pynieng kyrtong” la ong u Bah Hek.

U Bah Hek u la pynthikna ba haduh mynta ka Party kala ioh pdiang bun ki kyrteng jong ki briew ki ba kwah ban iakhun naka BJP.

Haba iadei bad ka jingiateh lok bad ka National People’s Party (NPP) haka ilekshon MDC, u Nongialam ka BJP u la ong “Hoid ngi kloi ban iatreilang bad ka NPP namar ngi la don lang haka Sorkar MDA I bad MDA II hynrei ngi hap ban peit shwa katno ngut ngin jop, lane katno ngut ka NPP ka jop haka MDC ilekshon ban wan”.