Nongpoh, Nohprah 22: Ki nongialam ha ryngkat ki dkhot ka Synjuk ki Rangbah Shnong jong 20 tylli ki shnong kata naduh Lai-Lad Marngar shaduh Umkra, mynta ka sngi ki la leit ban pynskhem ia samla hapoh ka shnong Mawkangi bad kiba la rung dkhot ialade ban long kum kita ki Village Defence Party (VDP), na bynta ban peit ia ka bha ka miat ha shnong ha thaw.

Ia kitei ki VDP Mawkangi, la leit ban pynskhem da u Bah Mission Tron, Chairman ka Synjuk ki Rangbah Shnong, ha ryngkat ka jingdon ki Pulit na Nongpoh Police Station, ki nongialam shnong lem bad ki riew paidbah ha katei ka shnong.

Hadien ka jingpynskhem na u Chairman ka Synjuk ki Rangbah Shnong, ia ka kam ban pynshai halor ki kyndon ain ba kumno ki VDP ki lah ban treikam ha ki shnong ki thaw bad ban tehlakam ia ki kam sniew, la pynshai da ki Pulit na Nongpoh Police Station, ha kaba ki la ioh ban pynshai janai sha kitei ki samla na katei ka shnong, kiba la long kum kita ki nongiada ia ka shnong ka thaw.

Lyngba jong katei ka sngi, ba la don ka jingpynskhem ia ki VDP ha katei ka shnong, ka la don ruh ka jingplie ia ka lympung ialehkai phutbol, kaba la pyniaid da ka VDP Mawkangi, ia kaba la ioh ban plie paidbah da u Bah Aibor Lyngdoh, uba dei u Rangbah shnong ka shnong Umkei.