Shillong, Nohprah 22: U Nongialam ka Meghalaya Bharatiya Janata Party (BJP) u Bah AL Hek hynne ka sngi u la pynpaw ïaka jingkyrshan iaka jingmang tyngka kaba 90:10 naka bynta ban pyntreikam iaka skhim bylla 100 sngi (Mahatma Gandhi National Rural Employment Guarantee Act (MNREGA).

Ia kane u Bah Hek u la jubab halor ka jingpyrshah ka Congress iaka jingthmu ka Sorkar Pdeng ba haka jingialam ka BJP kan pynkylla iaka kyrteng na ka MNGREGA sha ka G Ram G Bill ha Parliament.

Haba kren shaki lad pathai khubor u Bah Hek u la ong baka BJP ka shimkhia tang halor ka roi ka par bad kam pher, lada pynkylla ruh ia ka kyrteng  katei ka skhim bylla ba 100 sngi.

U Bah Hek u la ong ba ka jingmang tyngka 90:10 naka bynta ka skhim bylla 100 sngi kan long kaei kaei kaba ioh jingmyntoi, namar ki Sorkar Jylla ruh kin long trai haba pyntreikam iaka skhim nangne shakhmat.

“Haba ngi pyntreikam ia kano kano ka skhim nga sngew ba kan bha eh lada ki Sorkar Jylla ki long trai lang namar kin don ka bor bad ka itiar ban khmih bniah iaka skhim” la ong u Bah Hek.

“Lada ka jingbei tyngka kadei beit thik tang naka Sorkar Pdeng, ka Sorkar Pdeng ruh kan ong ba ka dei ka skhim jong ka, hynrei mynta ka jingshim jijgkitkhlieh lang daki ka Sorkar Jylla haka mang tyngka kan pynkhlain shuh shuh ban buddien haba pyntreikam iaka skhim bylla 100 sngi” u la ong.

Haba iadei bad ka jingpyrshah pynkylla kyrteng iaka skhim MNGREGA lyngba ka Bill G Ram G, u Nongialam ka Meghalaya BJP u la ong ba baka jingjer kyrteng iaka skhim haki snem mynshwa ruh ka biang bha.

U Bah Hek u la ong ba lada ka Sorkar BJP ka kwah ban pynkylla kyrteng iaka skhim ka hap ban shim jingmut naki paidbah bad lada baroh ki pdiang bad mynjur, ka kyrteng kam da donkam then eh.

“Ka kyrteng jong ka skhim kam don jingiapher namar baroh ngi kwah ia ka roi ka par namar ki paidbah haki thain nongkyndong jong ka ri kynthup ha Meghalaya ki donkam iaka roi ka par bad ka lad ban ioh kamai daka ba ioh kam” u la ong.