Nongpoh, Nohprah 24: Ka Khasi Student Union, Raid Nongtung Circle haka jingïalam u Bah Edmund Shadap kum u President ryngkat ki dkhot mynta ka 24 tarik Nohprah shuwa ban pdiang ïaka khristmas kaba dei ka sngi lehkmen jong ka jingwan longbriew u khyllung Jisu sha kane ka sla pyrthei kala leh ïa kawei ka kam ba bha sha ki paidbah da kaba mih ban pyntih surok ïaka shnong Umsaw Lum Dorbar kaba dei kawei naki shnong khappud bad ka Assam kaba don ruh hapdeng ka jingeh kaba khraw haka leit ka wan namar ka jingsahdien bad ka jingbym phaikhmat ka sorkar.

Naka liang ka KSU kala leit ruh ban pyntih surok ïa katei ka shnong dei hadien ka jingud jingnam jong ki paidbah hakhmat u Bah Samuel B Jyrwa Chairman ka NESO u ba la leit ban iuhkjat sha katei ka shnong myn haka 16 tarik mynta u bnai.

Kumban shu pynkynmaw, kane ka shnong ka dei ka jaka ba ki 30 tylli ki longiing jong ki Khasi ki shah thombor bad shah thang ha ka tnat Forest Assam ha u snem 2005, haka por ba u Bah Samuel B. Jyrwa  u bat kum u President ka KSU Sengkmie bad u Bah Hamlet Dohling kum u General Secretary ha ryngkat u Maieid Hopingstone Lyngdoh (Bam kwai ha dwar u Blei) ki la hiar mardor sha katei ka shnong ban leit khmih, ban ïarap bad ïada ïa ki paradoh parasnam ha katei ka shnong bad ki la pynshim wai da kawei ka jaka ban sher dara shipor na ka bynta kitei ki longiing kiba shah thombor ha katei ka por.

Haba ai jingkren ha kane ka sngi, u President ka KSU Raid Nongtung Circle, u la ai khublei kyrpang ia u President ba rangbah ka KSU u Bah Lambok Starwell Marngar, ba dei lyngba ka jingshim khia jong u kum u Nongialam ka KSU ka la lah ban pyntih ia katei ka surok na ka bynta ban suk ban sain ki paidbah nongshong shnong ha ka leit ka wan.

U la ai khublei kyrpang ruh naduh u Bah Samuel Jyrwa bad ruh ia u Bah Hoping stone Lyngdoh, ha ka por ba kane ka Shnong ha u snem 2005 ki la shah thombor ha ka Assam, ki la wan poi shaduh katei ka shnong ban ai ka jingiada ia ki nongshong shnong kiba la shah thombor ha ka Assam.

Ha kajuh ka por, u la pynpaw ruh ba kane ka shnong ka de ka shnong kaba dang sahdien bad ba ka sorkar haduh mynta kam pat lah ban leh ei ei, hynrei kane ka jingshim khia ka KSU bad baroh ki nongialam ka KSU ka la long shisha ka jingkyrkhu ia ki paidbah nongshong shnong ban ioh ia katei ka surok bad ha kajuh kapor ka seng ka kyntu jur ruh ia ka sorkar Meghalaya ban phai khmat lem ia ki jingdonkam jong ki paidbah nongshong shnong ha kane ka shnong khappud/.

Na ka laing u Secretary Shnong ka Umsaw Lum Dorbar, u Bah Khrawbor Lyngdoh, ruh u la pynpaw ia ka jingkmen ba ka KSU ka la leh ia kane ka kam kaba bha bad kane ka jingpyntih surok ia ka shnong ka la long kum ka jingai sngewbha Christmas ba kum ka Shnong ka kit bok kit rwiang ia u President ka KSU u Bah Lambok Starwell Marngar bad baroh ki nongialam ba kin dang lah shuh shuh ban ai ka jingshakri kaba bha tam bad ruh ban iada ia la ki para doh ki para snam.