Nongpoh, Nohprah 23: Kumba ka pyrthei baroh kawei kan sa pdiang ia ka Christmas, kaba ngi ngeit halor kata ka jingwan long briew U Khun u Blei bad ruh ba shen yn sa ioh pdiang ia u snem uba thymmai, u Bah Charles Marngar kum u MLA ka Mawhati Constituency u la shim ia ka kabu ban ai khublei kyrpang na ka bynta ka jingpdiang ia ka Christmas bad ia u snem ba thymmai sha baroh ki paidbah ka Mawhati Constituency, ki paidbah nongshong shnong ka Ri Bhoi District bad ha ka jylla hi baroh kawei.
Na ka liang u Bah Charles Marngar kum u Nongmihkhmat paidbah na Ri Bhoi District, u la ai ka jingkhublei kaba kyrpang naduh ki tymmen ki kro, ki Longkmie ki Longkpa, ki khun samla bad baroh ki heprit ba kane ka jingpdiang jongngi ia ka Christmas bad ia u snem 2026 kum u snem ba thymmai kan long shisha ka jingkyrkhu ia baroh ba ka mynsiem jong ka jingieit, ka jingsuk bad ka jingkmen kan synshar hapoh ki Dohnud jongngi.
Haba pashad ia ka khubor Christmas, u Bah Charles Marngar, u la sot na ka Ktien ka jong u Blei, na ka Gospel u Ioannis na ka lynong kaba 3;16 kaba ong, “Ba u Blei u la ieit katta katta ia ka pyrthei bad u la kloi ban aiti noh ia la u khun ba la kha marwei”, ha kaba u la pynwan dur ia kane ka khubor ba kane ka dei ka jingieit bah jong u Blei uba la kloi ban phah ia la u khun ba marwei sha ka pyrthei ban pynim ia kiba la jot la rem.
U la ban khia ruh da kaba ong ba ai ba ka jingieit ba kynja blei kan ioh rung ha ki dohnud jongngi, haba ngi pdiang ia ka Christmas bad snem thymmai, namar dei tang lada ngi don ia kata ka jingieit kaba ngi lah ban iohi ia ka jingkylla hapoh kane ka ri baieit jongngi.
“Haba don ka jingieit, ki ing ki sem, ka imlang ka sahlang bad ka ri baieit jongngi, kan don hapdeng ka jingkmen bad ka shongsuk shongsain kaba ngi lah ban iohi ia kata ka jingkylla ha ka longbriew ka man breiw bad ha ka ri baieit jongngi” u la ong.
Shuh shuh, u la kyntu ia baroh ba ngi hap ban don ia kata ka mynsiem jong ka jingiaieit, ka jingiatylli bad ka jingiasngewthuh ha ki ing ki sem, ha ka imlang ka sahlang bad ha ka jaid bynriew hi baroh kawei, namar dei tang lada ka jingieit blei kan synshar ha ki dohnud jongngi, ka lawei jong ki ing ki sem, ka imlang ka sahlang bad ka jaidbynriew hi baroh kawei kan kylla bad ngin dang lah ban kiew ha ha ka hok longbriew man briew, u la bynrap.