Nongpoh, K’lyngkot 13: Kawei ka Karkhana shna Tusok (Mattress) ha Byrnihat mynta ka sngi ka la shah bam duh ha ka ding, kaba dei hadien ka jingkem ding kynsan na ka Machine ha ka por ba ot ia ka tusok thiah kaba ki shna ha katei ka Karkhana ha kaba ki nongtrei ki la pyrshang ban pynlip ia ka ding bad kim lah leh ei ei shuh haduh ba la pynher mynsiem lut ia ki nongtrei ha katei ka Karkhana.

Kane ka jingjia ka la jia mynta ka janmiet ha ka por 3 baje ei ei ha ka por ba ki nongtrei ki dang shu de bam ja sngi bad kane ka Karkhana ka de kaba la long trai da u Adarsh Jujunwala ha kaba la ai kyrteng ruh ia kane ka Karkhana kum ka Ummadat Foam Industries kaba don  ha ka ShnongAmjok Byrnihat mar syndah bad ka  State Bank of India.

Kumba la iathuh da u trai ka Karkhana, la ong ba kane ka jingpluh ding ka la sdang na kawei ka ka Machine ba pyndonkam ban ot ia ki Foam, ha kaba ka ding ka la klang haduh ba la bam duh syndon ia ki jingdon jingem ha katei ka Karkhana.

Kumba la iathuh da u trai katei ka Karkhana la ong ba ia mynta ym lah ban tip haduh kattno ka jingshah ktah ne ka jinglut bad la antad ba ka jingduhnong ka la kot da ki spah  klur ba ka ding ka la bam duh bad pynjot.

Ki pulit pynlip na Byrnihat Police Outpost bad ki Kali pynlip ding na Narbong bad na Assam ki la wan poi mardor ban pynlip ia katei ka ding bad wat la katta ruh ka ding ka la bam duh ia baroh ki jingdon jingem kaba long ka jingduhnong kaba khraw ia u trai katei ka Karkhana.

Haba ioh ban ia kren bad u Rangbah Shnong ka Amjok u Bah Raju Jyrwa, u la pynpaw ia ka jingsngewnguh ia ki paidbah nongshong shnong ki ba la iarap ban iarap ban tem iaka ding bad kham tam iaki pulit ka Byrnihat bad ki tnad pynlip ding kiba ki la poi haka por kaba  biang ban pynlip ia ka ding ba ka ding kan nym ioh lad shuh ban pur sha kiwei ki ing ki sem ba don hajan katei ka Karkhana.