Nongpoh, Kyllalyngkot 13: Ban Pyntikna ïaka jingkylluid ka Surok na Nongpoh ter ter sha Umden, khamtam haki jaka ba long ïew, U MLA ka Nongpoh u Bah Mayralborn Syiem ha ryngkat bad ki Ophisar naka tnad PWD ki la leit ban jurip biang mytna ka sngi sa shisien ïa katei ka Surok naduh Nongpoh ter ter shaduh Umden.

Ïa katei ka jingleit jurip la sdang shwa daka jingialang bad ki Nongialam Shnong jong ka Shnong Ïew-Mawlong bad ka Shnong Mawdiang-Um ha ïing Dorbar Hall Ïewmawlong haka jingiadonlang ki Heh Pulit jong ka Ribhoi, hakaba la ioh ban ia kren pynbeit ha kaba ïa dei bad ka jingpynkylluid ïa ka Surok ba ïaid lyngba ka ïew kaba long ruh kum ka jaka rung na ka Surok Nongpoh, Umden. Hadien nangta, U MLA lem bad ki Ophisar naka tnad PWD ki la leit ban jurip sa ïa ka Surok haki bynta jong ka Umden.

Haba kren sha ki lad pathai hadien katei ka jingjurip, U MLA ka Nongpoh u Bah Mayralborn Syiem u la ong ba kane ka jingjurip ka long ban pynitynnad ïa  katei ka Surok ba iaid lyngba ka ïew kaba long ruh kum ka jaka rung lane ka entrance jong ka Surok Nongpoh Umden, bad ba ki Nongshong dukan kin nym tur than khnang ba ka surok kan long kaba kylluid.

Naka liang u MLA u la ïathuh ba naka liang ki Nongialam Shnong ka Ïewmawlong bad ka Mawdiang-Um ki la pyntikna ban pynioh iaki jaka shong dukan ba kyrpang naka bynta ki briew kiba ju shong harud jong ka Surok ha Ïewmawlong khnang ba kan nym don shuh kano kano ka jingkhapngiah ia ki paidbah ba leit ba wan khamtam ha ka sngi ïew.

U Bah Mayralborn Syiem u la iathuh ruh, ba kane ka kam ban shna ia ka Surok Nongpoh Umden Sonapur ka long shisha kaba la hun jrut ban peit bad baroh ki kam ki la dep 100 percent bad kaba sah ka long sa tang ban siang iaka rong ka baar ka ban pynjlih bad pynitynnad ia ka Surok ïa kaba mynta ki la sdang ia ka kam bad kan shim por kumba 2 taïew eiei ban pyndep.

Shuh shuh, u Bah Mayralborn u la ïathuh ruh, ba ha kine ki bnai ki ban sa wan, kin sa don bun tylli ki jingiaseng kiba heh ki ban sa long sha kine ki thaiñ, kumta kum u Nongmihkhmat u pyntikna ba yn pyndep pura noh ia kane ka Surok ha shwa ba kitei ki jingiaseng heh kin long khnang ba kan pynsuk iaki nongleit nongwan.