Shillong, K’lyngkot 22: U Bah Sanbor Shullai kum u Myntri sorkar ka jylla bad uba dei ruh u MLA ka party BJP ha Meghalaya, u la pynpaw lypa ba u Himanta Biswas Sarma un dang wan phai biang kum u Myntri Rangbah ka jylla Assam (Chief Minister), hadien kane ka election MLA 2026 ha ka ban sa long ha ka jylla Assam.

Haba kren sha ki Nongthoh Khubor mynta ka sngi, u Bah Sanbor Shullai kum u MLA BJP na Meghalaya u la ong, “Ka party BJP kan dang sar beit naphang ha kane ka election MLA 2026 ka ban sa long shen ha ka jylla Assam bad ruh ka party BJP ka dang lah ban thaw sorkar ha kaba u Himanta Biswas Sarma un wan phiang biang kum u Myntri Rangbah ka jylla Assam”.

Kane ka jingkren u Bah Shullai, ka dei ruh hadpeng ka jingialap election kaba jur bha jong ka BJP ha Assam bad ruh ba u Myntri rangbah ka Assam u Himanta Biswas Sarma u la kren lypa ba ka party BJP kan sa sar naphang ia ka jingjop ha kane ka election jied nongmihkhmat 2026 ha ka jylla Assam.