Ka kynhun ialehkai ka Nongkseh Sports Social & Cultural Club (SS&CC) ka la ioh ban rah ia ka namlahduh ha ka lyngpung ialehkai phutbol kaba la tip kum ka Chief Minister’s Gold Cup 2026 kaba la long ha Sikkim bad kata ka dei hadien ba ka la lah ban pynliem noh ia ka ka kynhun ialehkai ki BSF da 1-0, lyngba ka kol kaba la thep da u Kynsaibor Lhuid ha ka minit ba 51 ha ka kylla miet jong ka jingiakhun.

Ha katei ka jingiakhun phainal hapdeng kitei ki arkynhun, ka la dei shisha ka jingiakhun kaba itynnad bad kaba iakhaid bha, ha ryngkat ka jingdon da ki hajar ngut ki riew ieid phutbol, kiba la leit ban sakhi ia katei ka jingiakhun phainal.

Ka jingiakhun naduh ka kylla step bad ha ka kylla miet, ka la dei ka jingiakhun kaba iakhaid eh, namar ki rangialehkai na baroh kitei ki arkynhun, ki dei ki rangialehkai kiba la paw bad kiba la tbit eh.

Kum ka kynhun kaba la ioh ban rah ia ka namlahduh ha katei ka lympung ialehkai, ka Nongkseh SS&CC, ka la ioh ban khur ia ka song pisa kaba T. 20 lak ha ryngkat ka Trophy, nalorkata la don ruh ka khusnam shimet na bynta u rangialehkai ba tbit tam ha katei ka lympung ialehkai, ha kaba u Kynsaibor Lhuid na ka Nongkseh SS&CC, u la shah jied ban long kum u rangialehkai ba tbit ha katei ka lympung bad uba la ioh ruh ban rah ia ka kali Tata Tiago.