Ha kawei ka jingjia kaba la pynpar niangkhriat ia kiba bun kiwei pat ki briew kiba leit ban bam ha ka dukan bam Burger King kaba don ha Rajouri Garden jongka thain West Delhi, uwei u briew uba la 26 snem ka rta, u la shah siat iap haduh 38 kuli ha ki ar ngut ki runar hapoh katei ka dukan bam ha ka miet jong ka 18 tarik u bnai Jylliew, 2024.
Katkum ki tyllong khubor ba la ioh lum, la iathuh ba utei u briew uba la shah siat iap, udei uba la tip kyrteng kum Aman Joon. Ha ka shwa jong katei ka jingshah siat, la iathuh ba u Aman Joon u la leit bam sha katei ka jaka ryngkat bad kawei ka kynthei, bad katba ki dang iashong bad iakren ha katei ka dukan, ki ar ngut ki briew kiba shong hadien, ki la sei iala ki pistol bad siat beit ia u Aman Joon haduh ba u khlad syndon hapoh katei ka dukan.
La iathuh ruh ba ka jingriew ki kuli jong katei ka jingiasiat, ka la pynlamwir bad pynsyier ia kiba bun nongbam kiba donlang hapoh katei ka dukan bam bad pyrshang ban phet na katei ka jaka. La ong ruh ba utei u Aman Joon ruh u la pyrshang ban phet na katei ka jaka, hynrei kyllon noh ha ki bynta jong ka jaka siew pisa katei ka dukan, katba katei ka kynthei kaba don lang bad u, kam shym la don satia ka jingtieng ne jingsngeweiei halor katei ka jingjia, kaba la pynsuba ruh ba kadei maka kaba la pynbiej ia utei u shynrang ban wan bad iakut ha katei ka jaka bam.
Katkum ka ejahar kaba la ujor, la iathuh ruh ba la pyndonkam palat ar tylli ki tiar siat ban siatiap ia u Aman Joon hapoh katei ka dukan bam, kaba la thylli tang khyndiat minit hadien jong katei ka jingjia. Ki nongtrei jong katei ka dukan bam Burger King ki la iathuh ruh ba kitei ki runar kiba donkti ban siat iap ia u Aman Joon, kidei kiba don ha ki rta kiba 25-30 snem eiei.
Na ka liang ki bor pulit, ki suba ba kane ka jingjia, kadei ka jingpynhiar kput da ka kynhun jong ki runar halor ka jingjia shah pyniap jong u Shakti Dada ha u snem 2020 haka jylla Haryana. Ki bor pulit ki iathuh ba katei ka kynthei, hadien jong katei ka jingjia, ka phet krad ryngkat bad ka mobile phone bad ka pla pisa (wallet) jong u Amman Joon, bad kadei kaba la don dak sniew lypa bad ka jingthwet ban iohkem iaka, ka dang iaid shakhmat.
Halor kane ka jingjia, uwei na ki nongialam jong ka kynhun ki runar, uba la tip kyrteng kum u Himanshu Bhau, uba la suba phetrieh ha ka ri Portugal, u la kam jingkitkhlieh halor katei ka jingjia kumba la suba da ki bor pulit. Utei u Himanshu Bhau lyngba ka jingthoh ha ka sla social media ka jong u, u la ong ba u Aman udei uba don bynta ban pyniap ia u hynmen u jonngi, u Shakri Dada bad kane ka jingdei ka kput, da kaba byrngem ruh ba kiwei de ki ba donkti ruh kin sa ngat ha ka juh ka apot shen.
