Nongpoh, Jylliew 20:
Kumba la ialam da ki mynbarim naduh hyndai hynthai, ki khun ki hajar jong ka Raid Marngar hashwa ba kin hiar sha ki ki pynthor ki jongki ban thung ban tep ia u Kba, ki da pynlong shwa ia ka jinglehniam lehrukom ryngkat ka suid ka shor bad ka duwai ka phirat sha U Blei nongbuh nongthaw ba Un kyrkhu kyrdoh ba kin ioh ia u Kba uba seisoh, uba met bad lait na ka jingshah bam khniang, ne kino kino ki jingpynjulor.
Haba ioh ban iakren ia kane jinglehniam lehrukom kaba dei ka dustur jong ki khun ki hajar ka Raid Marngar, u Pa’iem Richard Syiem, u la ong ba kane ka jinglehniam hashwa ban thung ia u Kba ha ki pynthor, kadei ka riti ka dustur jong ki khun ki hajar ka Raid kiba la hikai pateng la pateng da ki mynbarim ha kaba u Kni jong ka ing, un hap ban suid ban shor shwa da ka Kyiad Um, U Klong u Skaw ban buh jingduwai bad kyrpad sha u Blei nongbuh nongthaw ba un pynseisoh ia u Kba bad pyntip ruh ba na ka liang ka jong ki khun ki hajar ruh, ki ngeit ba ka ju long kumta, bad kida ioh shisha ruh ia U Kba uba seisoh bad u ba met.
