Nongpoh, Jylliew 20: Ki nongialam shnong ka Umtrai ha ryngkat ki katto katne ngut ki nongialam ka NPP Mawhati Block, ki la leit ban kynduh ia u Bah Prestone Tynsong, Symbud Myntri rangbah, uba dei ruh u Myntri ka tnat PWD ha ka sorkar jylla, kata na ka bynta ban pynsngew sha u halor ka jingdonkam kaba kyrkieh ki paidbah ka shnong Umtrai ba kin ioh ia ka surok ba bha, namar kumba ka long mynta ka surok kaba ki pyndonkam, ka dei kaba la sniew eh bad kaba la wanrah jingeh shisha ha ka leit ka wan ki paidbah.
Ha ka jingleit ban kynduh ia u Bah Prestone Tynsong, la sakhi da ka jingdon u Bah Shemboklang Marbah, Rangbah Shnong umtrai, nangta u Bah Barrister Trang, Secretary shnong, ha ryngkat ka jingsynrang u Bah Shemphang Lyngdoh, President ka NPP Mawhati Block lem bad kiwei.
Lyngba jong katei ka sngi, ba kitei ki nongialam shnong bad NPP Mawhati, ki la leit ban kynduh ia u Bah Prestone Tynsong, ki la ioh ban pynsngew ia kata ka jingeh, ba ki paidbah kiba shong ba sah ha Umtrai, kaba dei ruh ka shnong khappud hapdeng ka Meghalaya bad Assam, ki kynduh jingeh, namar ka jingsniew palat ka surok, kaba la wanrah jingeh ha ka leit ka wan ki paidbah.
Ha katei hi ka sngi, nalor ba ki la ioh ban pynsngew halor ka jingeh namar ka surok, kitei ki nongialam shnong, ki la ioh ruh ban pynsngew sha u halor ka jingthmu ban pynkylla noh ia u Postal Pincode, uba katei ka shnong ka dang hap hapoh ka Jagiroad, hynrei ki paidbah ki kwah noh ba un hap noh sha Umsiang hapoh ka jylla Meghalaya.
Haba iadei bad kitei ki jingeh, ia kaba la leit ban pynsngew da kitei ki nongialam shnong bad nongialam NPP Mawhati, na ka liang u Bah Prestone Tynsong, u la ai ka jingkular ba katei ka shnong kan sa ioh surok thymmai bad ruh ba un sa shimkhia ha ka ban pynkylla noh ia u Postal Pincode uba na Jagiraod Assam sha Umsiang Meghalaya.
BA SNIEW PALAT KA SUROK HA UMTRAI, KYNDUH BAH PRESTONE TYNSONG KI NONGIALAM SHNONG BAD NPP MAWHATI, IOH SYNDON IA KA JINGKULAR BAN PYNSHNA
