Nongpoh, Jylliew 20: Ban pynpaw ia ka jingpyrshah halor ka jingdon ki shipai BSF kiba la wan ban buh ktem ha shnong Sonapyrdi, Dona Umbluh bad Ratachera, ki nongialam ka Khasi students Union (KSU) East Jaintia Hills District Unit, mynta ka sngi, ki la kiew sha Nongbah Shillong, na bynta ban kynduh ia ka Kong I. Nongrang, Director General of Police (DGP) ka sorkar jylla, kata na bynta ban pynsngew sha ka, halor ka jingbymhun ki paidbah ia ka jingwan buh ktem ki shipai BSF ha kitei ki shnong.
Hadien ba la dep ban kynduh ia ka DGP, kitei ki nongialam ka KSU, lyngba u samla K.S Suchiang, General Secretary ka KSU EJH, haba kren sha ki lad pathaikhubor, u la ong ba ka jingdon ki BSF ha kitei ki shnong, ka wanrah pynban ia ka jingma bad bym shongsuk ki paidbah.
U la ong ruh, ba ki don ki khep ba kitei ki shipai BSF, ki ju pyndik ia ka leit ka wan ki paidbah, kiba ju thombor ia ki nongshong shnong da ka ba bom bad nalorkata ki ju pynjulor ruh ia ki jingdon jingem jong ki paidbah ha kitei ki shnong bad katei ka thain hi baroh kawei.
Shuh shuh, utei u nongialam KSU na EJH, u la ong ruh ba kham mynshwa, ki nongialam ka Seng ha ryngkat ki nongialam shnong na katei ka thain, ki la phah da ka dorkhas sha u Bah Prestone Tynsong, Symbud Myntri Rangbah ka Jylla, na bynta ban pynsngew halor katei ka phang, hynrei haduh mynta kam shym la don kano kano ka jingshimkhia, ha kaba kitei ki shipai BSF ki bteng ban leh ia ki kam leh donbor bad kaba la pynsyrtok pynban ha ka leit ka wan ki paidbah.
“Kitei ki shipai kiba la buh ktem ha kitei ki shnong, ki dei ki jaka jong ki riew shimet bad haba kitei ki shipai BSF ki buh ia kitei ki ktem, ki khlem shym la shim jingbit na ki trai jaka lane na ki bor shnong bor thaw bad dei halor kata ka nongrim, kaba la pynlong ia ki nongialam ka KSU, ba ki dawa weng mardor noh ia kitei ki ktem shipai BSF” ong utei u nongialam ka KSU.
Ha kawei pat ka liang, lyngba jong katei ka jingleit kynduh DGP, na ka liang ka KSU EJH, ka kyntu ia ka DGP ba kan buh noh ia kawei ka Infiltration Check Gate ha surokbah ha Tongseng, khnang ban ioh tehlakam ia ka jingwan rungtuh ki briew nabar bad ha kajuh ruh ka por ban tehlakam ia ka jingpyndonkam ki nongkhaii drok ia katei ka surok.
