Nongpoh, K’lyngkot 21: Kum ka jing shim bynta lang bad ka Ri baroh kawei, ki bor pynïaid jong ka Ri-Bhoi District mynta ka 26 tarik kala shimbynta bad snohktilang ban rakhe ïaka Republic Day kaba 77 jong ka Ri India ha madan NSCA Mini Stadium Nongpoh.
Ha kane ka sngi u Bah Metbah Lyngdoh myntri ka tnad sam bording ka jylla u la wan ban shim bynta kum u kongsan ban pynher ïaka lama lai rong ka Ri bad ban shimbynta haka Rashtriya Salute haka jingïaid march pass bala shim bynta tang da ki pulit, ki khynnah skul baki skul bapher bapher ka ri Bhoi.
Ha kane ka sngi la sakhi ruh da ka jingdonlang u Bah Mayral Born Syiem MLA ka Nongpoh, Kong Rona Khymdeit MDC ka Nongpoh, Bah Isynei Hinge MDC ka Umroi, Bah Mathew Makdoh Nominated MDC ka Nongpoh, u Abhilash Baranwal Deputy Commissioner ka Ri-Bhoi District, u Giri Prasad Superintendent of Police Ri-Bhoi District, ki ophisar naki tnad sorkar bapher bapher.
Ka jingrakhe hakane ka sngi ka long kaba shongkun da ka jingshibynta jong ki khynnah skul haki prokram bapher bapher naduh ka shad ka rwai da ki jingwai ieid ri bad ruh ka jingshim bynta bad pyninam iaki kali Tableau naki tnad sorkar bapher bapher.
Naka liang ki bor district kila sam ruh ïaki khusnam bapher bapher ha katei ka sngi sha ki kynhun bad ki riew shimet, ki nongtreimon sngewbha kiba la don bynta ban shakri bad kyntiew ïaka imlang ka sahlang haki liang baroh kumjuh ruh ka khusnam sha ki skul ba tbit haka jingleh march pass bad ka jingpyninam iaki tableu da ki tnad sorkar ha Ri Bhoi.
Haba kren ruh ha kane ka sngi, u Bah Metbah Lyngdoh u la ai khublei kyrpang ia ki paidbah nongshong shnong ka jylla kiba la shim bynta ban rakhe ia kane ka Republic Day, ka sngi kaba ngi burom ia kata ka ri synshar paidbah bad ruh ba ka ri ka la ioh ha kane ka sngi ba la dap 77 snem ia la ka riti synshar hapoh ka ri.
U la pynkynmaw ruh ia ki riewkhraw ka ri naduh u Mahatma Gandhi, u Jawaharlal Nehru, u Subhas Chandra Bose lem bad kiwei kiwei ki nongialeh laitluid ka ri bad kytnhup ruh ia ki khla wait ka jylla kiba la don bynta ha ka jingiakhun laitluid ia ka ri ba kynthup ia u Syiem Tirot Singh, u Kiang Nongbah bad u Patogan Sangma, ba dei lyngba ka jinglen lade jongki, ngi la ioh ia ka jinglaitluid bad ruh kum kata ka ri synshar paidbah kaba don la ka jong ka riti synshar hapoh ka ri.
Shuh shuh, u la kren ruh halor shibun ki mat ba ka sorkar ka buh iaka thong ban kyntiew ia ka jylla bad khamtam ban wan rah ia ka shongsuk shongsain ha ka jylla bad ruh ha ki shnong khappud ba ka sorkar ka la peitngor bha ban iada na kino kino ki kam kiba ktah ia ka shongsuk shognsain. U la pynpaw ruh ia kiwei kiwei ki thong ba ka sorkar ka la buh ban kyntiew ia ki paidbah ka jylla bad khamtam ka thong ban kyntiew ia ka ioh ka kot ki paidbah lai shah ba la buh thong haduh u snem 2032.