Nongpoh, K’lyngkot 24: Ka FKJGP Pahamrioh Circle mynta ka sngi ka la pynhap pyrda noh ia kawei na ka lympung ialehkai phutbol ba la tip kum ka ‘1st Knockout Football tournament’ ba la pynlong ha Madan Shnong ka Pahamrioh ha Ri Bhoi.
Ia kane ka tournament la wan ban pynhap pyrda u Bah Lui Star Lyngdoh, President ka FKJGP North Khasi Hilsl District Unit kum u kongsan bad la sakhi lang ruh da ka jingdon lang u Samla Kitborlang Suting, Organizing Secretary, u Samla Gabriel Sun, Assistant General Secretary, u Samla Stephring Lawrynniang, President ka FKJGP Pahamrioh Circle lem bad kiwei kiwei ki nongialam bad ki dkhot ka FKJGP na Ri Bhoi District.
Ha kane ka jingpynhap pyrda ia kane ka tournament, ka Dong Paseh FC ka la ioh rah ia ka nam lahduh da kaba ka la pynrem noh ia ka Pahamriohlum lyngba ka jingiashut lyngba ka tie breaker ba la ioh ban rong ruh ia ka song pisa kaba T. 20 hajar ryngkat ka Trophy.
Kane jingiakhun kine ki ar kynhun, ban ia knih iaka nam lahduh ka la long shisha kaba pynsngewthynnad ia ki paidbah nongpeitkai bad ki nongkyrshan jong kitei ki ar kynhun, hynrei ha kaba kut ka Dong Paseh FC ka la rah ia ka nam lahduh kaba dei lyngba katei ka jingiashut ia ka tie breaker.
Ha kane ka sngi, u Bah Luistar Lyngdoh bad kiwei ki nongialam ym tang ba ki la sam ia ki khusnam sha kitei ki ar kynhun kiba la poi sha ka thong ha ka nam ba nyngkong bad ka nam baar, hynrei ki la ai ruh ka jingkren kum ka jingkyntu kynpham ia ki khun samla ba ka daw kaba la pynlong ia ka seng ban pynlong ia kane ka tournament, ka dei ban ai lad ia ki khun samla don sap vab sei ia ki sap ki phong ha ka kam ialehkai phutbol.