Nongpoh, K’lyngkot 27: U Bah Mayraldborn Syiem, MLA ha ryngkat u Bah Mathew Makdoh, MDC, mynta ka sngi, ki la leit ban plie paidbah noh ia ka ophis treikam ba thymmai jong ka Iatreilang Village Organization, kaba kdup ruh ia ki 6 tylli ki Self Help Group (SHG’s), kaba la tei itynnad bha ha shnong Pahambir Them Ri Bhoi.

Ha katei ka sngi, ba la plie ia katei ka ophis ba thymmai jong ka Iatreilang VO, nalor ka jingdon u MLA bad MDC, la sakhi ruh da ka jingdon u Bah B. Basawiamoit, Gram Sevak Nongpoh Circle Umling Block, u Bah Sency Lyngdoh, Lyngdoh ka Raid Nonglyngdoh, ka Kong Virginia Maring President ka Iatreilang VO, u Bah B. Sivingstone Makri Rangbah Shnong Pahambir Them lem bad kiwei.

Haba iadei bad katei ka jingialang ban plie ia katei ka ophis thymmai ka Iatreilang VO, ki nongai jingkren, kiba kynthup naduh u MLA, MDC lem bad kiwei, ki la ai ka jingïaroh ïa ki nongialam jong ka Iatreilang VO, kiba la ai ka jingshakri na ka bynta ka imlang ka sahlang bad kiba la iatreilang lem bad kitei ki 6 tylli ki SHGs, khlem da don kano kano ka mynsiem ia bishni pihuin, hynrei tang ka mynsiem jong ka jingiatreilang bad kyntien iwei ia iwei pat.

Lyngba jong katei ka sngi, u Bah Mayralborn Syiem, kum u MLA, u la ioh ban aiti ia ka work order sha ka Iatreilang VO, khnang ban kin ioh ban pynbha shuh shuh ia katei ka ophis treikam jong katei ka Village Organization.