Shillong, K’lyngkot 27: Haba kren sha ki lad pathaikhubor mynta ka sngi ha Nongbah Shillong, u Bah Prestone Tynsong, Symbud Myntri ka sorkar jylla bad uba dei peit ia ka District Council Affairs (DCA), u la ong ba shen ka sorkar jylla kan pynbna noh ia Ilekshon MDC ne ban jied ia ki nongmihkhmat ha ka Garo Hills Autonomous District Council (GHADC).

“Shen bad ha kine ki khyndiat sngi ban wan, phin sa tip bad bna halor ka Ilekshon GHADC, kata hadien ba ka sorkar lyngba ki Myntri Sorkar kin sa shim ia ka rai bad hangta ka sorkar kan sa pynbna paidbah” ong u Bah Prestone Tynsong.

Haba iadei bad ka jingmih ki jingkynthoh halor ka jingpynkynriah ia ka Ilekshon GHADC, u Bah Prestone Tynsong, u la ong ba kitei ki jingkynthoh ki dei kiba ym don nongrim, namar ka samoi jong ka Ilekshon GHADC kan kut haduh ka 18 tarik u Iaiong, kumta shwa ban poi utei u bnai, kumta shwa ban poi ha utei u bnai, kaba mut ba lah ban pyndep ia ki kam Ilekshon GHADC.

Haba iadei pat halor ka jingdawa ban pynlong ia ka Special Intensive Revision (SIR) ha Garo Hills, u Bah Prestone Tynsong, u la ong ba katei ka kam ka hap hapoh ka jingpeit jingkhmieh jong ka Election Commission, ha kaba ynda ngi la ioh ia ka jingpynbna ne btah bad hangta ngin sa pyntreikam, u la bynrap.