Shillong, K’lyngkot 28: Uwei na u Nongtrei mon sngewbha (Social activist) u Greneth M Sangma mynta ka sngi u la dawa syndon na ka sorkar Meghalaya ban buh da ki bor pahara ba khlain bad ruh ban pynlong ia ka jingthwet kaba jur pyrshah ia ka kynhun ISIS-K ha West Garo Hills.
Kane ka jingdawa une u nongtrei mon sngewbha u la mih shakhmat ban dawa ia ka I bor pahara, ka dei hadien ba la saphriang ka jingthoh (Poster) ha ki rynsan social media ba la maham jur ia ki paid Garoi ba dei ban mih noh na ki jaka ki puta ba ki shnong haduh u snem 2027.
Kumba la paw, kane ka poster lane ka jingthoh ba la tah ha nar post ilektrik ka dei kaba la soi da ka ISIS-K lyngba u Aminur Islam, uba dei u Area Commander ka Plain Belt Area.
“ Nga pynrem jur ia kum kine ki jingham bad nga kyrpad jur ia ka sorkar ban shim khia ia kane ka kam bad ruh ban buh ia ki bor pahara ha West Garo Hills bad ruh ba buh ia ki bor pahara (Additional Camp) na ka bynta ban twet jurne tohkit ia kitei ki kynhun ISIS-K ba ki briew kiba nabar ki la wan kam jubor ia ki jaka puta bad ruh ban ai ka jingiada kaba jur ia ki paid Gara ha Garo Hills” pynpaw u Sangma ha ka shithi ba la phah mynta sngi sha u Symbut Myntri ka sorkar jylla bad uba peit ia ka tnad ka kam pohing u Bah Prestone Tynsong.
U la pynpaw ruh ba katei ka jingthoh ne ka poster ka la wan rah ka jingtieng jingsyier ia ki paid Garo ha Garo Hills bad khamtam kum ha Phulbari, Rajabala, Tikrikilla, Selsela, Garobhada bad Tura.
U la pynpaw ruh ba ki briew kiba wan na Bangladesh ki don ruh ia ka EPIC ha Assam bad ha Meghalaya.
Shuh shuh, ha katei ka shithi, u la la pynpaw ba kitei ka kynhun ISIS-K ki la wan kam beain ne kam jubor ia ki jingdon jingem bad ki jaka ki puta ki paid Garo ba la pynkupbor katkum ka riti synshar ka ri bad u la ong ruh kum kine ki jingjia la donkam ban pyntreikam noh ia ka ILP, ban pynduh noh ia kino kino kiba don EPIC ha ki ar jylla bad don la ka jong ka Electoral Roll ha GHADC, NRC ha Meghalaya bad ruh ban don ki ain kiba khlain ban ai ka jingiada kaba kyrpang ia ki trai jylla.