Nongpoh, K’Lyngkot 27: U Bah Prestone Tynsong symbud myntri rangbah ka jylla ba khmih ruh ïaka tnad kam pohiing mynta ka sngi u la ïathuh ba ka sorkar ka dang bishar bñiah ban pynrung ïaki kyndon kiba ïasyriem kum ka Inner Line Permit haka Immigration and Foreigners Act 2025.

U Bah Prestone u la ong ruh ba halor kane naka liang u Myntri Rangbah ka jylla u la dep ban ai jingkren bad mynta ngi dang bishar bñiah la ngi lah ne em ban pynrung ïaki kyndon ba thymmai kum ka ILP hakane ka Immigration and Foreigners Act ba thymmai da kaba phai ruh sha ki kyndon ba bñiah ha ka Immigration and Foreigners Act, 2025 bala mynjur da ka Parliament ka ban sa khmih bñiah da u Advocate General ryngkat ka kynhun stad aiñ.

Ha kaba ïadei bad ka jingmih ki jingkynnoh halor ka jingbym pyntreikam ïaka MRSSA 2016, u Bah Prestone u la ong ba ka sorkar jylla kam shym la iehnoh ïa kane ka aiñ, namar katto katne ki bynta jong ka MRSSA la pyntreikam mynta bad ki don ruh ki District Task Force bala khlieh da ki Deputy Commissioner bad kane ka aiñ ka treikam pura.

Ha kaba ïadei bad ka Amendment Bills jong ka MRSSA, u Bah Prestone u la ong ba ka aiñ tynrai jong ka MRSSA kam don satia ki kyndon ban pynieng khyrdop Entry bad Exit Point bad dei na kane ka daw ba ïa kane ka aiñ la phah sha Ministry of Home Affairs.