Shillong, K’Lyngkot 28: U Myntri sorkar jylla ka Meghalaya, u Marcuise N Marak, u la pynrem jur ia ka poster kaba maham ia ki Garo, ba ki dei ban mih noh naki jaka jongki, kaba la kynnoh ba la soi da ka seng ISIS-K.

Naka liang utei u myntri u la pynthikna ba ki bor district jong ka West Garo Hills kin sa shimkhia ban leh ïa kaba donkam ïaki briew kiba donkti ban byrngem ïaki paidbah.

“Kum u nongmihkhmat jong ka Jylla Meghalaya, bad nyngkong eh, kum u nongshong shnong, bad kum u dkhot jong ka jaidbynriew Garo, nga pynrem jur ïa kane ka jingpyntieng bad byrngem pyrshah ïa ka khyndew ka shyiap jong ngi, ïa ki briew jong ngi, bad ka jingïashong suk shongsaiñ jong ngi,” ong u Marak da kaba bynrap ruh ba ka jylla Meghalaya ka don hapdeng ka jingsuk ka jingsngewthuh jingmut bad ka jingïatylli jong baroh ki jaitbynriew.

U la ong ruh ba kum kine ki jingpyrshang ban pynphriang ia ka jingtieng bad jingiapher kim don jaka ha ka imlang sahlang jong ngi, la ong u Marak da kaba bynrap  ruh ba ka jylla Meghalaya ka la ju ieng na ka bynta ka jingiatylli, ka jingburom markylliang, bad ka jingiatylli hapdeng baroh ki jaitbynriew, khlem da khein ia ka niam ne ka jaitbynriew, bad ngi dang iaineh skhem ha kine ki jinglong.

Naka liang utei u myntri sorkar jyla u la ong ruh ba la pyntip sha ki bor synshar district bad ki dang pynlong ia ka jingpeitngor kaba tyngeh ban lap bad leh pyrshah ia kiba donkti ha kane ka kam byrngem byrsit kaba wanrah ka jingshongsyier ïaki paidbah bad kyrpad ruh ïaki paidbah ba kim dei ban tieng hynrei ban long kiba peitngor bad ban don ka jingshaniah haka sorkar bad ki bor synshar district ban ïada ïaki.