Nongpoh, K’lyngkot 28: Ka kynhun ki nongialehkai kiba don ha ka shatri ka Muay Thai Association of Meghalaya (MTAM), kaba la ialam da u Bah Angelus Sun kum u Nonghikai (Coach), ka la wanphai noh sha ka jylla mynta ka sngi, kata hadien ba ki la ioh ban khur ia ka kyrdan kaba ar ha ka 7th Umai National Senior Muay Thai Championship kaba dang shu dep long ha Hyderabad, Telangana.
Ïa katei ka lympung la pynïaid da ka Telangana Amateur Muay Thai Association ryngkat ka jingïatreilang bad ka WMC India, ha katei ka rynsan jingïakhun ka kynhun MTAM ki la ioh ban khur haduh 27 tylli ki takma Ksiar, 17 tylli ki takma Rupa bad 11 tylli ki takma Rnong, kumta haba khein kyllum lang ki la ioh ban khur haduh 55 tylli ki takma, kaba la pynlong ruh ia ka jylla Meghalaya ba kan khur ia ka kyrdan ba-ar napdeng ki 29 tylli ki jylla kiba la leit ban iashimbynta ha katei ka lympung.
Haba kren sha ki lad pathai khubor, u Bah Angelus Sun u la pynpaw ïa ka jingkmen bad jingïaroh ïa ki samla ïalehkai kynthei bad shynrang kiba la ïakhun tyngeh wat hapdeng bun ki jingeh. U la ong ba ka jingïaishah bad ka jingïakhun shitrhem jong ki samla ka la pynlah ïa ka kynhun ban wan ba-ar ha katei ka national championship. U la kyntu ruh ïa kito kiba khlem ioh takma ba kin ym duh mynsiem hynrei ban nang bteng ban trei shitom bad pynjanai ïa ka sap jingïalehkai jong ki ha ki sngi ban wan.
Ha kawei pat ka liang, ki Nongshong Shnong ka Dong Nongkyndang, Saiden, ki la mih paidbah ha surok bah ban pdiang bad pynkup burom ïa u Ujal R. Marak, uwei na ki samla ïalehkai uba la shim bynta bad ka kynhun Muay Thai jong ka jylla. Utei u samla, uba dei u khun jong ka shnong ka Mawpdang, u la ioh ban khur artylli ki takma, kynthup ïa ka Takma Ksiar ha ka jingïalehkai Mauymai bad ka Takma Rupa ha ka jingïakhun Waikru.
