Nongpoh, Rymphang 06: Ha ka Executive Dorbar jong ka Elaka Nongpoh Sirdarship kaba la long mynta ka sngi ha iing Dorbar Pahamsyiem, Nongpoh bad kaba la wan ban ïashimbynta da baroh ki Lyngdoh jong ki Hynniew tylli ki Raid kiba hap ha Elaka Nongpoh Sirdarship, ki la shim ia ki katto katne tylli ki rai kiba long kum ki sienjam, khnang ban lait na ki huri hura ne ki kynrum kynram haba iadei bad ki jaka puta bad ruh ban wanrah ia ka bha ka miat ha baroh ki shnong ki thaw kiba hap hapoh ka Elaka Nongpoh Sirdarship.

Kumba ban shu kdew hangne, ba ki Hynniew tylli ki Raid kiba hap ha ka Elaka Nongpoh Sirdarship ki kynthup ia ka Raid Raid Nongkharai, Nongkhyllem, Nongpoh, Nongkhrah, Nonglyngdoh, Sohkwai bad Raid Nongkyrla.

Haba kren sha ki lad pathaikhubor hadien ba katei ka jingialang, u Bah Luistar Lyngdoh, uba dei u Acting Sirdar ka Elaka Nongpoh Sirdarship, u la ong ba lyngba katei ka Executive Dorbar ka Elaka, ki la shim ia kawei ka rai ba kongsan bha haba iadei bad ka khyndew ka shyiap, kata ka dei halor ka rukom ban leit register sha ki ophis sorkar, ha kaba ki la shim ia ka rai ba nangne shakhmat kino kino kiba mut ban register ia ki jaka jong ki sha ki ophis, na bynta ban pynshisha ia ka jinglongtrai ia ki jaka puta, ka donkam ba kin ioh shwa ia ka jingpynshisha na ka Dorbar Shnong, Dorbar Raid bad na ophis Elaka Nongpoh Sirdarship.

U la ong ruh ba ka nongrim kaba la pynlong ia ka Executive Dorbar ba kin shim ia katei ka sienjam, ka dei hadien ba ki la lap ba don ki khep ba ia kawei ka jaka la dep ban register ha ki ar-kyrteng bad kaba wanrah ia ki huri hura bad kynrum kynram. Namarkata lyngba katei ka jingialang, ngi la shim ia ka rai ba nangne shakhmat ba ki nongialam Shnong, ki nongialam Raid bad na Nongpoh Elaka Sirdarship, ki donkam ban leit sorjamin shwa ia ki jaka puta, kata hashwa ban pynthikna ia ka jinglongtrai bad kata ka jaka ka don ha kano ka jaka, khnang ba yn nym don huri hura hadien habud.

“Ngi la iakren ruh halor ki kam jied Rangbah Shnong ha baroh ki shonng kiba hap ha ka Elaka Nongpoh Sirdar, ha kaba ngi la shim ia ka rai ba nangne shakhmat ba kino kino ki shnong kiba thmu ban jied thymmai ia ki nongialam shnong, ba ki dei ban pyntip sha ka Dorbar Raid bad ka Dorbar Raid kan pyntip sha ka Elaka Nongpoh Sirdarship, hadien kata ngin sa leit ban jied bad ban pynthikna ia ki Rangbah shnong, kata khnang ban nym mih kano kano ka huri hura ha ki kam jied rangbah shnong” ong u Bah Luistar Lyngdoh.

Namarakata, lyngba katei ka jingialang, la kyrpad ia baroh ki nongialam Shnong, ba kin ai ka iatreilang bad ki Dorbar Raid bad ka Elaka Nongpoh Sirdarship, khnang ba kan don ka jingiatreilang naduh ki Dorbar Shnong, Dorbar Raid bad ka Elaka Nongpoh Sirdarship, khnang ba yn nanglah ban wanrah ia ka bha ka miat ha ki shnong ki thaw, ha ki Raid bad ha ka Elaka Nongpoh Sirdarship.