Nongpoh, Rymphang 06: Ban pynkhlain ia ka Party na ka bynta ka Election 2028 ha ka jylla Meghalaya, Ka party BJP Ri Bhoi District mynta ka sngi ka la plie ia ka ophis ba Pura ha Nongpoh na ka bynta ban long kum ka shlem ban saindur ia ki kam jong ka party bad ruh ban dang pynkhlain shuh shuh ia ka party da ka jingtmu ban pynieng kyrtong ha baroh 5 tylli ki Constitiency kiba don ha Ri Bhoi District.

Ïa kane ka ophis jong ka party BJP Ri Bhoi District la wan ban plie da u Rikman G. Coming uba dei u State President ka BJP ha ryngkat ka jingdon lang u State General Secretary ka BJP u Bah Wankitbok Pohshna,  State Secretary Daniela  Nonglait, u District President ka BJP Ri Bhoi u Bah Sen Thabah, ki Mandal President na ki Constituency lem bad ki nongtrei jong ka party.

Kane ka ophis kam dei tang ka ophis jong ka District BJP ka Ri Bhoi bad ka dei ruh ka ophis jong baroh ka BJP Mandal ha Ri Bhoi.

Haba ai jingkren ha kane ka sngi naduh u State President ka BJP u Rikman G. Coming, u State General Secretary u Bah Wankitbok Pohshna ki la pynpaw ia ka jingkmen ba ka BJP ha Ri Bhoi ki la lah ban plie ïa la ka jong ka ophis, ka ban long kum ka jaka ban saindur ne pynkhlain ia ka party.

Ki la pynpaw ruh ka jingkmen ba kat dang mih ki sngi ka party BJP ka la dang khlain ha Ri. Bhoi bad kane ka dei ka jingtrei shitom ki nongialam ha kaba ki khmih lynti ruh ba ka BJP kan dang trei borbah ban ioh ia ka jingkyrshan na ki paidbah khnang ba ka party kan dang lah ban wan rah ka jingkylla bad ki kam pynroi ha kane ka District kaba dei ha ka jingialam u  Narendra Modi kum u Myntri rangbah ka Ri.

Shuh shuh ki la pynpaw ruh ba kane ka dei ka jingsdang ka party ban pynkhlain ia ka party ha Ri Bhoi bad kila rai ruh  ban pynieng ia ki Kyrtong na ki san tylli ki Constituency ha Ri Bhoi ha ka election 2028 bad ki khmih lynti ruh  ba ka Ri. Bhoi kan pynmih ia ki MLA ka BJP na Ri Bhoi na bynta ban trei ia ki kam pynroi na ka bynta ki paidbah ha Ri Bhoi District.