Nongpoh, Rymphang 07: Kum kawei na ka thong ban kyntiew ia ki khun samla don sap ha ka kam ialehkai phutbol bad shi bynta ruh ban pynmih pisa na ka bynta ban kyrshan ia ka Kyrdemkulai LP &UP School, ka Khasi Students Union (KSU) Kyrdemkulai Unit ba hap ha ka KSU Umsning Circle mynta ka sngi ka la plie pyrda noh da ka lympung ialehkai phutbol ba la tip kum ka Maitshaphrang Cup ba la pynlong ha Kyrdemkulai.
Ia kane ka lympung ialehkai phutbol ka KSU Kyrdemkulai Unit la wan ban plie pyrda da u Samla Rangbah u Bah Lambok Rymbai, Vice President ka KSU North Khasi Hills District kum u kongsan bad u Bah Dabid Lyngdoh uwei na u samla ka thain kum u symbut kongsan.
Kiwei kiwei kiba la ia don lang ha kane ka sngi ki kynthup ia u President ka KSU Umsning Circle u Samla Lester Nongbet, u Bah P. Kharnaior rangbah shnong ka Kyrdemkulai, u General Secretary ka KSU Kyrdemkulai Unit u Samla Atiarbaneh Laloo lem bad kiwei kiwei ki dkhot ka KSU bad ki riew rangbah.
Ha kane ka lympung ialehkai phutbol la wan ban shim bynta haduh 16 tylli ki kynhun ialehkai bapher bapher bad ha kane ka jingplie pyrda ia ka jingialehkai phutbol la ia khun pyrshah hadpeng ka Kur Shylla bad ka KSU Umran Niangbyrnai, hynrei hapdeng ka jingiaknieh ia ka nam jop ka KSU Umran Niangbyrnai ka la pynrem noh ia ka Kur Shylla da 2-1 kol.
Ha kane ka sngi, la ai jingkren ruh naduh u Samla Lambok Rymbai, u Bah David Lyngdoh bad u Samla Lester Nongbet, ha kaba ki la ai ka jingiaroh ia ka KSU Kyrdemkulai Unit kiba la pynlong ia kane ka lympung ialehkai phutbol ban ai rynsan ia ki samla don sap ha ka kam ialehkai phutbol bad shi bynta ruh ban kyrshan ia ka Kyrdemkulai LP and UP school na ka bynta ban kyntiew ia ka pule ka puthi.
Ha kajuh ka por, ki la khot la wer ruh ia ki samla ban pyndonkam hok ia ki sap ki phong ba ki don ha ka jingialehkai phutbol, namar lada kum ki samla ki lah ban kiew shaphrang ka long ka burom bad ka nam ia ka dong bad ka thain ba ka kam ialehkai phutbol ka la dei kawei na ka jingialehkai kaba ai kam ai jam ia ki samla ha kane ka juk mynta.