Ampati, Rymphang 07: U Myntri Rangbah ka jylla u Conrad K Sangma mynta ka sngi u la plie piadbah ïaka Hospital ba 10 jingthiah kaba la tip kum ka 10-bedded Integrated AYUSH Hospital ha Merengipara ha South West Garo Hills District kaba dei ruh hapoh ka National Ayush Mission.

Ha kane ka sngi la sakhi ruh da ka jingdonlang u Sanjay A Sangma MLA ka Mehendraganj Constituency, u Ian Botham M Sangma MLA ka Salmanpara bad kiwei kiwei ki heh sorkar bad ki ophisar.

Haba kren ha kane ka sngi u Myntri Rangbah ka jylla u la pynpaw ka jingsngewkmen kaba khraw halor ka jingsdang ieng katei ka jaka sumar da kaba ong ba kane kam dei tang ka jingbuh ïa u mawnongrim, hynrei ka nongrim naka bynta ka lawei ban ai ka jingshakri kaba paka sha ki paka ha kaba ïadei bad ka koit ka khiah.

U la ong ruh ba ka Integrated AYUSH Hospital ka pyni ïa ka jingangnud ba skhem jong ka Sorkar ban nang pynjanai ïaka jingshakri haka liang ka koit ka khiah, khamtam ha ki jaka ba jngai bad khappud. U la pyntip ruh ba ïa kane ka project la mynjur haka mang tyngka jong u snem 2025–26 ha kaba ka jinglut baroh kan long haduh 7 klur.

U Myntri Rangbah ka Jylla u la pynbna kin don kumba 35 tylli ki kam thymmai hapoh kane ka projek. Kine ki kynthup ïa ki doktor AYUSH, ki nurse bad ki nonghikai Yoga bad kane ka jaka sumar kan long ruh kum ka jaka sumar ïaki samla kiba la ngop haki jingdih buaid ban pynlong ïaka Meghalaya kaba khlaiñ lyngba ka jingdon ki samla kiba koit ba khiah namar ïa kane ka Hospital la shna naka bynta ki khun ki kti bad ka pateng ban wan.

Namarkata naka liang u Myntri Rangbah u la ong ruh ba kane ka jaka sumar kam dei tang naka bynta ka thaiñ Merengipara hynrei ïa kiwei kiwei ki thaiñ ba marjan namar la shna ïaka haka rukom kaba janai katkum ka juk mynta ban ai ka shakri kaba bha bad kaba paka tam sha ki paidbah.