Nongpoh, Rymphang 11: Wat la u dei uwei na u samla uba don ka jingduna ha ka liang ka dkhot met kaba um da lah ban ïaid ban ieng kumba long lem kiwei kiba biang ha ka dkhot met, u Samla Pering Pale na ka Shnong Umpowin ha Ri Bhoi District u don pat ka mynsiem ban ïa tei ne ban ïa peit lem na ka bynta ka bha ka miat jong ki paidbah nongshnong shnong ha Ri Bhoi District.
Haba kren sha ki lad pathai khubor, u Samla Pering Pale u la mih shakhmat ban ai khublei kyrpang ïa ka tnad Pulit na Ri Bhoi ba ki la shim khia ha kaba ïa khun pyrshah ban pynduna ïa ki Kali ba pynkhein ain ba bun ki mynsiem ba kordor ki duh ïa la ka jingim tang na ka daw ka jingleh khlem akor ki Dribar.
“Nga kwah ban ai khublei kyrpang ïa u Senior Superintendent of Police barim ka Ri Bhoi bad uba la kiew kyrdan mynta kum u DIG u V.S Rathore ha kaba wat la u la shah pynkynriah kam na Ri Bhoi bad ki kam kiba u la shakri ka la ïarap shibun ha Ri Bhoi ban pynduna ïa ki jingjia ba sngewsih ha ki surokbah” ong u Samla Pering Pale.
U la ong ruh kumba la ïalam da utei u heh pulit ba la shah pynkynriah kam kum u SP ka Ri Bhoi bad u angnud pat ba u SP ba thymmai ka Ri Bhoi u Giri Prasad ruh un dang trei borbah kumba la ïalam da une u heh pulit na ka bynta ban pyrkhing ïa ki Kali ba pynkhein ain khnang ba kin nym mih kino kino ki jingjia ba sgnewsih ïa ki paidbah.
Shuh shuh, u la ai khublei kyrpang ïa utei u SP barim ka Ri Bhoi halor ki kam kiba u la shakri ban wan rah ïa ka shongsuk shongsain ha Ri Bhoi bad ruh ban shngain ki paidbah ha ka leit ka wan ha ki surok bah bad ha kawei pat ka bynta u buh ruh ka jingkyntu ïa u SP ba thymmai ka Ri Bhoi lem bad ka kynhun pulit jong ka Ri Bhoi ba ki dang trei shitom ban shakri na ka bynta ka bha ka miat ki paidbah bad ruh ban dang ïa khun pyrshah ïa ki Kali ba pynkhein ain kaba long na ka bynta ka jingshngain ki paidbah ha ka leit ka wan, u la bynrap.
