Shillong, Rymphang 11: Kum ka jingbteng ban ïakhun tyngeh pyrshah ïa ka jingkynrei u Drok ha nongbah shilling, ka Drug Reduction, Elimination & Action Mission (DREAM) mynta ka sngi ka la pynlong da ka jingïakynduh lang ki Village Defence Parties (VDPs) ha Nongbah shillong na ka bynta ban ïa kren ne ïa thir sani halor ka jingdonkam ban ïa trei lang ki shnong ki thaw ha kaba pynduh jaid ïa ka jingkynrei u drok.
Kane ka jingïakynduh lang ki VDP la ïa kren sani bha halor ban pynduna ïa ki jingpyndonkam ïa u drok bad ruh ban khot ban wer ïa ki nongshnong shnong bad ki shnong ki thaw ban ïa trei ryngkat.
“Ki VDP ki don ka bynta kaba khraw bha ha ki shnong ki thaw ban ïarap ïa ki bor pulit ka Meghalaya ban ïa khun pyrshah ïa u drok” ong u Mission Director ka DREAM u Bah Francis Kharshiing haba kren ha kane ka sngi.
Ha kane ka jingïakynduh lang, la ïa kren sani ruh halor ka jingdonkam ban don ki kynja ïing kyrpang ha man la ki shnong na ka bynta ban peit kyrpang ïa kito kiba la kyni ha u drok bad lyngba ka jingdon kum kine ki kynja ïing kan ïarap ruh ïa kito kiba la kyrni ha u drok ba kin lait syndon na ka jingdih drok ne ban pynlait ïa lade na ki jingdih ïa u drok.
U la ong ruh ba la pynsngewthuh kyrpang ïa ki VDP halor ka kam kaba khraw ba ki ïarap ïa ki Dorbar Shnong bad ruh ba kin ïarap ruh na ka bynta ban ioh ïa ka NOC na ka bynta ban buh kum kine ki ing kiba kyrpang na ka bynta kiba kyrni ha u drok. U la kren ruh halor ka jingdonkam ban don ki jinghikai kiba kyrpang ban thaw ïa ki lad ki lynti kum ka lad ioh kam ioh jam ïa kiba la kyrni ha u drok bad kane kan pynduna ruh ïa ki ba kin lait na ka jingkyrnih ha u drok.
La ïa kren ruh ha kane ka sngi, halor ka bynta jong ki VDP ban kyrshan ne ban long kum ki sakhi haba ioh ba kurup drok, ban don ryngkat bad ki bor pulit haba kurp drok ne kem ïa kiba dih drok bad ruh ba kin long ki nongai ktien sha ki bor pulit ban ïa khun pyrshah ïa u drok.
Ki VDP kiba la wan poi sha kane ka jingïakynduh lang ba la pynlong da ka DREAM ki kynthup ïa ka VDP na Lawsohtun, Lumparing, Madanrynting, Demthring, Mawlai Iew-Rynghep, Lapalang, Nongthymmai, Mawlynrei Nongkrem, Mawlai Umjaiur, Umpling, Smit Pyllun, Nongrah bad kiwei kiwei de.
