Nongpoh, Rymphang 11: Ka Balang Presbyterian Sonidan ba hap ha ka Mawbuh Sarikrai Presbytery, Ri Bhoi Synod ka la sdang ban pynkhreh shaid shaid ban pdiang ia ka jingiaseng bah ba la tip kum ka Regional Women Bible Society Conference ka ban sa long ha u bnai Risaw 2026 ha ka Balang Presbyterian Sonida ha kaba palat 500 ngut ki Delegates kin wan ban shim bynta.

Ban pynbit pynbiang ia kane ka jingiaseng ne ka Conference, ka Balang Presbyterian Sonidan ryngkat u MLA u Bah Charles Marngar ki la ia shong pyrkhat hynnin ka sngi ban thaw ia ki lad ki lynti na ka bynta ki jingdonkam ha katei ka jingiasengbah ban wan banshim bynta na Ri Khasi-Jaintia.

Na ka liang u Bah Charles Margnar kum u MLA u la pynlong ia ka jingiakynduh lang hynnin ka sngi ba la shim bynta lang naduh ki nongialam ka Balang, ki nongaialam shnong, ki Seng Samla, ki Seng Longkmie  bad kynthup ruh ki ophsiar na ka tnad PWD, PHE, MeECL na ka bynta ban ia kren sani ne ban thaw ia ki lad ki lynti ban pynbiang na ka bynta ban pdiang ia katei ka jingiasengbah.

Ha kane ka sngi, ka la long ruh ka jingai mynsiem ia ka Balang Presbyterian Sonidan ban pdiang ia katei ka jingiaseng bah, namar na ka liang u Bah Charles Marngar kum u MLA u la kular ban pynsted ia ka kam bad ruh ban thaw ia ki lad ki lynti ban pynbiang ia baroh ki jingdonkam naduh ki surok, ka umbam ka umdih, ka bording ilektrik bad kiwei kiwei ki jingdonkam na ka bynta ban pynlong ia katei ka jingiasengbah ba kan long kaba jop bad ka ban long ka jingkyrkhu ruh ha ka jingim ba kynja mynsiem na ka bynta ki paid riewngeit ka Balang Presbyterian.