Nongpoh, Rymphang 11: Da ka jingshim khia u MLA ka Mawhati Constituency u Bah Charles Marngar ka la long ka jingkyrkhu kaba khraw ha ka leit ka wan, ha kaba ka surok khyndew kaba jgnai kumba 100 meter ban pyniasoh sha ka Health Sub Centre Sonidan bad mynta la lah ban siang da ka surok Dewbilat kabapaka ba la pynsuk shisha ia ki paidbah haba leit ban shah sumar ha katei ka jaka ai jingsumar ka sorkar.

Kum ban pynkynmaw, kane ka surok ha ki snem ba la leit noh naduh ki doctor, ki nongtrei ka tnad ka koit ka khiah bad wat ki paidbah ki mad jingeh ban iaid lyngba ka surok khyndew ba pyniasoh sha katei ka health Sub Centre Sonidan bad khamtam haka por slap ba wat ki Kali kit nongpang kim lait ban leit, hynrei lyngba ka jingshim khia u MLA ba khlem da pat pynmang skhim la lah ban shna da ka surok dewbilat ba paka kaba la suk ha ka leit ka wan ki paidbah.

Dei hadien ba la dep ban shna da ka surok dewbilat ba paka, u MLA ka Mawhati u Bah Charles Marngar ha ka 10 tarik u Rymphang 2026, da lade u la leit ban plie paidbah ia kane ka surok ban aiti sha ka shnong bad ka jaka ai jingsumar ban pyndonkam na ka bynta ka leit ka wan haba pang ba shitom.

Haba plie ruh paidbah ruh ia kane ka surok, u MLA u la pynlong ruh ia ka jingjurip ia katei ka Health Sub Centre bad la pynsngew ruh halor shibun ki jingduna ba dang donkam na ka sorkar kumba la pynsngew da ka bor shnong bad ki bor katei ka jaka ai jingsumar bad na ka liang u MLA ruh u la kular ban shim khia ban kren sha ka sorkar bad ruh ban thaw ia ki lad ki lynti na ka bynta ban pynbiang ia kita ki jingduna ha katei ka jaka ai jingsumar kaba long ka jaka ban ai jingsumar ia kiba pang ba shitom ha katei ka thain.